Gareth Bale ayaa lagu soo waramayaa inuu codsaday inaan lagu soo darin kooxda Tottenham ee ciyaar saaxiibtinimo la ciyaareysa Monaco, madaama xiiso uu uga imaanayo Real Madrid.
Xiddigan garabka ka ciyaara ayaa si aad ah loola xiiririnayaa xagaagan kooxda Madrid, inkastoo Spurs loo soo bandhigay lacag rikoor adduun noqoneysa oo ka badan 100 milyan euro ama u dhiganta 90 milyan ginni.
Ka dib markii ay soo baxeen warar sheegaya in ciyaaryahanka uu ku wargeliyay Tottenham inuu doonayo inay heshis la gaaraan Los Blancos, 24 jirkaan ayaa lagu soo waramayaa inuu codsaday inaan lagu soo darin kooxda berri ciyaareysa ee Tottenham.
Spurs ayaa berrito kulan saaxiibtinimo la ciyaareysa kooxda Monaco, waxaana wararka la helayo ay sheegayaan in Bale uu taam u yahay kulankaan, isagoo seegay kulamadii saaxiibtinimo ee kooxda ay ku soo ciyaartay Asia.
Si kastaba, jariirada AS ee ka soo baxda Madrid Spain ayaa sheegeysa in Bale uusan dooneynin inuu la duulo kooxda inteeda kale oo uu aado Monaco, hadii lagu qasbana inuu kooxda raaco inuu diidi doono inuu ciyaaro.