Hargeysa(GNA)-Golaha Wakiiladda ayaa Maanta Warsaxaafadeed ka soo saaray kulamo Al-baabadu u xidhnaayeen oo muddo saddex maalmood ah u socday todobaadkii hore.
Warsaxaafadeedkan oo ka kooban 8 qodob oo ka mid ah waxyaabihii Kulamadaasi lagaga wada hadlay,ayaa arrimaha ugu muhiimsan ee Goluhu ku sheegay wax aka mid ah in Mudaneyaashu isku raaceen in la xisaabtan dhab ah xukuumadda lagu sameeyo, lana tayeeyo Maamulka Golaha.
Nuqul ka mid ah Qoraalka Mudaneyaasha Golaha wakiiladda oo Gobanimonews heshay, ayaa sidoo kale lagu xusay baaqyo goluhu ka soo saaray Shaqaaqadii ka dhacday Deegaanka Gowso-weyne, Shaqo la’aanta, Tahriibta iyo qodobo kale oo muhiim ah.
Waxaanu Warsaxaafadeedkani u dhignaa sidan:- Golaha Wakiilada JSL
WAR SAXAAFADEED
Golaha Wakiilada JSL oo ah Golaha sharci dejinta 1aad, ahna golihii ugu horeeyey ee shacbigu soo doortay waxa uu yeeshay saddex fadhi oo xidhan maalimihii Axadda , Isniinta iyo salaasada ee ku taariikheysnaa 25 ilaa 27 August 2013.
Fadhiga xidhan ee mudanayaasha dodo dhaadheer ka yeesheen
Xaalada Guud ee amni iyo nabadgelyo ee Jamhuuriyadda Somaliland .
Waxay u jeediyeen baaq nabad gelyo beelaha walaalaha ah ee shaqaaqadu ku dhex martay degmeda oog, waxay tacsi u direen dadkii ku geeriyooday , kuwii dhaawacmayna waxay eebbe uga baryeen inuu caafimaad degdeg ah siiyo.
Waxay kale oo ay shacbiga Somaliland ugu baaqeen inay ilaashadeen nabadgelyada, wada noolaashada iyo wadajirka geesna uga soo wada jeestaan cadawga Somaliland.
Arrimaha dhallinyarada , shaqo la,aanta iyo tahriibta.
Waxa goluhu ugu baaqay dhallinyarada Somaliland inay dalkooda hooyo aaminaan
Waxa Goluhu ugu baaqay xukuumadda , shirkadaha iyo ganacsatada waaweyna Inay sameeyaan mashaariic shaqo loogu abuurayo dhallinyarada
Waxa Goluhu u soo jeediyey xukuumadda iyo shacbiba si adag loola dhagaalamo shabakadaha dembiilayaasha ah eek u foogan ama ku hawlan tahriibinta dhallinyarada
Waxa Goluhu isla qaatay inay qayb muhiim ah ka noqdaan wacyi gelinta dhallinyarada ee tahriibta.
Maadaama sidaan ka war qabno khasaare badan oo naf iyo malaba lihi ka dhasho dooxyada xili roobaad kasta gaar ahaan dooxyada kuwa u dhaxeeya Hargeysa iyo Berebera, waxa goluhu ugu baaqay deeq bixiyayaasha iyo xukuumadda in loo qorsheeyo dhismo biirjyo (bridges).
Waxa Goluhu xukuumadda u soo jeediyey iyada oo fulinaysa ku dhaqanka dastuurka ay Golaha Wakiilada u soo gudbiso heshiiyada ay gasho.
Isaga oo fulinaya wajibkiisa dastuuriga ah, waxa Goluhu soo jeediyey in la xoojiyo dab galka Xukuumada.
Maciishada iyo sicir bararka.
Iyada oo heerka shaqo la,aanta shacbiga Somaliland aad u sareeyo, sanadihii ugu dambeeyeyna macashiidu kor u kacaysay sicir barar joogta ahina jiray, waxa Goluhu baaqa u jeediyey xukuumadda JSL inay qaado talaabooyin lagu xakameynayo sicir bararka iyo ascaarta ama qiimaha badeecadaha
Sidoo kalena waxay ganacsatada JSL u soo jeediyeen inay u naxariistaan shacbiga Somaliland ee danyarta ah ee maciishadu ku sii adkaaneyso.
Waxa kale oo mudanyaashu dood adag ka yeesheen
Wanaajinta iyo tayeynta maamulka Golaha.
Xoojinta Xil gudashada mudanyaasha iyo ilaalinta saacadaha shaqada
Dardar gelinta shaqada guddi hoosaayadda Golaha
Dhamaystirka shuruucda qabyada ah ee Golaha taal
Mudanyaasha Goluhu waxay u soo jeediyeen ciidaanmka amaanka iyo hey,adda dawladda inay dhawraan dhawrsanaanta iyo maamuuska dastuurku siiyey mudanyaasha baarlamaanka JSL .
Allaa Mahad Leh
Hargeysa, 31st August.
Gobanimonews
Hargeysa Office
Email:editor@gobanimonews.com