Hargeysa(GNA)-Warsaxaafadeed uu soo saaray Guddoomiyaha Xisbiga Kulmiye Muuse Biixi Cabdi ayaa lagu shaaciyay in Wasiirka Maaliyadda Cabdicasiis Maxamed Samaale lagu daray Guddida Fulinta ee Xisbigaasi laga bilaabo 26/02/2014.
Arrintan ayaa ka dambeysay soo jeedin ku jirtay go’aamo dhawr habeen ka hor lagu soo afjaray muran mudddo soo jiitamayay oo Xisbiga ragaadiyay.
Cabdicasiis Maxamed Samaale ayaa loolan adagi ka dhexeeyay Guddoomiyaha Xisbiga Muuse Biixi Cabdi, kaasoo ay ku hirdamayeen hogaaminta Xisbiga ee shanta sanadood ee soo socota.
Hase ahaatee Guddi dhexdhexaadineed oo arrinta xisbiga soo afjartay ayaa go’aamiyay in Wasiir Samaale lagu daro Guddida fulinta, Muuse Biixina Kursiga Guddoomiyaha ee shanta sanadood aan lagula tartamin.
Qoraalka lagu shaaciyay xubinimada Guddida falinta ee Cabdicasiis Maxamed Samaale oo nuqul ka mid ahi soo gaadhay Gobanimo ayaa lagu yidhi sidan:
XISBIGA MIDNIMADA & HORUMARINTA SOMALILAND
(KULMIYE)
Address: Jigjigayar, Ibrahim Kodbur District, Hargesia Somaliland.
Tell: 00252-2-527883
Mobile: 00252-4134891,4026659
Email: headquater007@hotmail.com/Website: www.kulmiye.com/www.kulmiye.org
REF: XK/XG/004187/2014
Date: 26/02/2014
Ku: Cabdicasiis Maxamed Samaale
Ku: Xoghayaha Guud ee Xisbiga KULMIYE
Ujeedo: xubin ku daris Guddida fulinta.
Waxa lagu daray Guddida Fulinta ee xisbiga KULMIYE Md. Cabdicasiis Maxamed Samaale, waxaannu laga bilaabo maalinta taariikhdu tahay 26/02/2014 noqonayaa xubin ka tirsan Guddida Fulinta ee xisbiga KULMIYE.
ALLA MAHAD LEH
Md. Muuse Biixi Cabdi
Guddoomiyaha Xisbiga KULMIYE