"Golaha Guurtia waxaan ka codsanayaa inaanay dhexdhexaadintooda dawo uga dhigin wax muddo kordhin, ee la qabto doorasho wakhtigii laga soo hormariyo"Gudoomiyaha Waddani
Hargeysa(GNA)-Gudoomiyaha Xisbiga Waddani, ahna Guddoomiyaha Golaha Wakiillada Cabdiraxmaan Maxamed Cabdillaahi (Cirro) Maanta ka hadlayay munaasibad xisbigiisu ku soo dhaweeyay Taageeeraal cusub, ayaa sheegay in Khilaafka Kulmiye saameyn ku yeelanayo Doorashooyinka soo socda.
Guddoomiye Cirro ayaa Golaha Guurtida, gaar ahaan Guddida loo saaray dhexdhexaadinta Xisbiga Kulmiye, ugu baaqay inaanay xalka Khilaafka xisbiga ka raadin muddo kordhin loo sameeyo Madaxweynaha, balse laga shaqeeyo sidii dalka looga qaban lahaa doorasho badbaado qaran ah.
“khilaafka xisbiga Kulmiye waxa uu saamayn ku yeelanayaa doorashooyinka soo socda,xidhiidhka waddamada jaarka ah,Golaha guurtidana waxaan ka codsanayaa inaanay dhexdhexaadintooda dawo uga dhigin wax muddo kordhin, layidhaado waxaanu soo jeedinaynaa in doorashada wakhtigeedii laga soo hormariyo si dalka loo badbaadiyo taas oo ah xalka kaliya ee meesha yaala”ayuu yidhi.
Cirro ayaa isagoo hadalkiisa sii wata yidhi “Kulmiye markii hore taageero farabadan buu helay balse hadda waxaa soo baxay midabkiisii dhabta ahaa nin maalintii oo dhan makhaayadda fadhiya oo suuqyada maraya yaa habeenkii saqda dhexe gurigiisa loogu dhacayaa maxaa keenaya sababtaas? “qoladayada mucaaradka ahi waxaanu ka sii baqaynaa waxa dhicidoona waayo xildhibaano ayaa la xidh-xidhay tartankii doorashooyinkuna suu soo dhawyahay”
Digniin hore
Cirro ayaa horaantiisa sanadkan ka digay dib u dhac ku yimaadda doorashada madaxweynaha.
“Ma yeelayno Dib u dhac ku yimaada Doorashada, muddo kordhin maya maya maya”ayuu ku yidhi bishii March ee sanadkan kulan uu la yeeshay Ardayda Jaamacadaha hargeysa.
Khaalid Xamdi Maxamed
Gobanimonews
Hargeysa Office