“Somaliland Maanta Haddii Ummadeedu Ay Tashatay Oo Ficil Xorriyadeedii Kula Soo Noqotay Halgan Dheerna Ay U Soo Martay Mid Ay Ka Noqonayso Iyo Mid Ay Ka Laabanayso Maaha.” Madaxweyne Siillaanyo
Madaxweynaha (Gobanimonews)24-1-2014-ka Somaliland Mudane, Axmed Maxamed Maxamuud (Siillaanyo), ayaa markii u horeysay ka hadlay qodobka sagaalad ee heshiiskii ay Somaliland iyo Somalia ku gaadheen dalka Turkiga todobaadkan.
Madaxweyne Siillaanyo oo Telefishanka Qaranku wax ka weydiiyey, sida uu u arko qodobka Sagaalaad ee Heshiiskii ka soo baxay wada hadaladii Somaliland iyo Somalia ee Turkiga oo maalmihii u dambeeyey Siyaasiyiinta Somaliland siyaabo kala duwan uga hadlaysay, ayaa waxa uu yidhi “Taasi waxay ka mid tahay waxyaabaha aynu inta badan ku doodaynay, waana wax isiri ah oo xaqiiq ah oo taariikh ah in dhibaato badan shacabka Somaliland loo geysto, diyaaradda Hargeysa dhexdeeda saaran waa diyaaraddii Hargeysa ka kacaysay ee shacabku markuu Itoobiya u qaxayey ka deba tagtay ee dumarka iyo carruurta qarxinaysay, qirashadaasina waxay muujinaysaa sababihii shacabka Somaliland la soo noqdaan Madax-banaanidooda”
Dhinaca kale, Madaxweynaha Somaliland Mudane Axmed Maxamed Maxamuud (Siilaanyo) oo ku sugan dalka Ingiriiska, ayaa ka hor intii aanu ka soo dhoofin Faransiiska isaga iyo Weftigii uu hogaaminayey, waxa uu hadal u jeediyey jaalliyada Somaliland ee ku dhaqan dalka Faransiiska.
Madaxweynaha Somaliland, Md. Axmed Maxamed Maxamuud (Siilaanyo) oo khudbad u jeediyay jaalliyada Paris ayaa uga xog waramay mawqifka madax-banaanida Somaliland, waxaanu tilmaamay inuu yahay mid aan dib looga laabanayn, isla markaana aan gorgortan cidnaba lagala galayn madal kasta oo la isku hor fadhiisto, waxaanu yidhi “Waxaynu ognahay Soomaaliya waxay ku doodaysaa in aynaan dal madax-banaan ahayn, waxaanay diidan tahay wixii halganka dheer loo soo galay ee ummada reer Somaliland u soo halgamaysay, inagoo markii horeba gooni ahayn oo xamaasadii 1960-kii markii la qaatay xorriyada ee aynu doonanay dalkii Talyaanigu xukumi jiray, tii Ingiriiska xukumayay, Soomaalida Itoobiya degan iyo ta Kiiniya degan inay isku yimaadaan, wixii wax suurtagala way noqon wayday, qolo waliba halkeedii ayay barakaysatay Kiiniya iyo Jabuuti halkeedii ayay barakaysteen way ka faa’iideen oo wax wayn bay ka noqdeen. Jabuuti waataas oo xorriyad ayay qaadatay madax-banaani ayay yeelatay si wanaagsan bay u hirgashay oo waxeedii ugu fiicnaadeen.” ayuu yidhi madaxweyne Somaliland, Md. Axmed Maxamed Maxamuud (Siilaanyo).
Madaxweynaha Somaliland waxa uu intaas ku daray isagoo cadeeyay in qaddiyada Somaliland ay tahay mid aan gorgortan gali karin, wada-hadalkana waxyaabo badan lagaga wada hadli karo, “Waxaanu leenahay Somaliland maanta haddii ummadeedu ay tashatay oo ficil xorriyadeedii kula soo noqotay halgan dheerna ay u soo martay mid ay ka noqonayso iyo mid ay ka laabanayso maaha. Anagu wada-hadal waanu raadinaynaa, inaanu nabad kuwada noolaano waanu raaadinaynaa, laakiin taas macnaheedu maaha meel kasta oo la iskugu tago dunida ama Yurub ha noqoto ama Istanbul waxyaabo badan ayaa laga wada-hadli karaa oo wax wada qabsi laga samayn karaa, sidii la iskaga kaashan lahaa budhcad-baddeeda iyo waxyaabo kale oo badan oo mandaqada ah, laakiin madax-banaanida Somaliland iyo gooni isku taageeda waa mid aan cidnaba gorgortan lagala galayn.”
Wariye Cabdiwali Cali Ismaaciil
Abdiwali1991@gmail.com
Gobanimogroup@gmail.com
Hargeysa Office/Somaliland