Addis-ababa(GNA)-War saxaafadeedka ka soo baxay kulan magaalada Addis-ababa ku dhex maray wefti ka socda Somaliland iyo Madaxweynihii hore ee Nayjeeriya ayaa lagu sheegay inay labada dhinac iska xogwareysteen arrimo badan oo dhanka Siyaasadda khuseeya.
Ma jiro war madaxbanaan oo ka soo baxay ujeedada kulanka iyo natiijada ka soo baxday, hase ahaatee sida lagu sheegay warsaxaafadeed dawladda Somaliland soo saartay weftiga ayaa Obsanjo uga waramay xaalada somaliland iyo marxaladihii ay soo martay.
Warsaxaafadeedka ayaa lagu yidhi “Waftiga Jamhuuriyada Somaliland uga qayb-galayey wada hadalada dalka Somaliya oo ku sugan magaalada Addis-ababa xarunta dalka Ethiopia, oo maal-maha inagu soo aadan u amba bixi-doona dalka Turkiga, ayaa maanta magaalada Adis- ababa kulan, kula yeeshay madaxwaynihii hore ee dalka Nigeria Obasango.
Waftigan oo uu hogaaminayay wasiirka Arrimaha debadda Somaliland, Mudane, Maxamed Biixi Yoonis, waxa kulankaasi ku wehelinayay wasiirka madaxtooyada Mudane, Xirsi Cali Xaaji Xasan, waxaana madaxweynihii hore ee dalka Nigeria uga xog warameen marxaladihii kala duwanaa ay Somaliland soo martay nabadaytii beelaha, dhismaha dowladnim iyo sababihii keenay in qarinameeda dib-u-lasoo noqoto Jamhuuriyada Somailand.
Waftiga waxay sharaxaad mug leh ay ka siiyeen madaxwaynihii hore ee dalka Nigeria Obasango, guud bahaanba xaalada jamhuuriyada Somailand. Heerarkii nabadgalyo, dhismaha dowladnimo iyo dimoqraadi yada Somaliland ay ku talaabsatay oo ku dhisan dhidibo adag oo qawaaniin iyo sharci distoori ah ku qotanta.
Waxa kaloo intaas ay ugu dareen xog waranka ay siiyeen madaxwaynihii hore ee dalka Nigeria Obasango. In Somaliland kaalin nabad-galyo oo muhiin ah kaga jirto gobolka geeska Afrika, oo dhibatooyin badan oo soo jiitamay oo mahadhi waaya ka jireen mudo dheer.
Madaxwaynihii hore ee dalka Nigeria Mr. Obasango. oo horeba xog buuxda uga haystay xaalada Somaliland, waxa uu ku amaanay dowlada iyo shacabka Somaliland horumarka ay gaadhay iyo talaabooyinka ay qaaday oo mudan iyo kuwo u noqonkara tusaale wanaagsan oo inay ku daydaan ay tahay wadamo badan oo ictiraaf haysta, waxaanu xusay Mr. Obasango. Muhiiimada iyo sida loogu baahan yahay in beesha caalamku barbar istaagto dadaalka ay wado dowlada Somaliland ee uu hogaaminayo Madaxweyne Axmed Maxamed Maxamuud (Siilaanyo).
Kulankan oo ahaa mid qiimo gaara u leh labada dhinacba ayaa ku soo gabagaboobay jawi wanaagsan”ayaa lagu yidhi war ka soo baxay Xukuumadda Somaliland.
Gobanimonews
Hargeysa Office
Email: editor@gobanimonews.com