Wayne Rooney ayaa gaaray goolashiisii 200aad ee Manchester United
kulankii xalayto ay 4-2 kaga badiyeen Bayer Leverkusen, laakiin
weeraryahanka reer England ay ka diiday ITV inuu haatan ka hadlo
mustaqbalkiisa.
Rooney ayaa labo gool dhaliyay isagoo sidoo kalena caawiye ka ahaa
goolkii Valencia, kulankiisii ugu horeysay ee David Moyes uu ciyaaro
Champions League isagoo macalin ka ah kooxda.
Si kastaba, markii ITV ay weydiisatay hadii uu saldhigtay Old Trafford
ka dib xagaa mustaqbalkiisa shaki la gelinayay, Rooney ayaa si adag u
jawaabay isagoo yiri: “Dhageyso, waxaan diirada saarayaa kubadeyda sidii
aan soo sameeyay xagaagii oo dhan. Waxaan si aad ah uga soo shaqeeyay
inaan taam u noqdo xilli ciyaareedka. Waan ku faraxsanahay sida aan ku
soo laabtay, waana ku faraxsanahay inaan goolal dhalinayo.”
Wariyaha ITV ayaana Rooney ku riixay su’aal kale oo mustaqbalkiisa ku
aadaneyd isagoo weydiiyay hadii uu xagaagii weydiistay Manchester United
in la iibiyo iyo in kale, waxaana uu ku jawaabay si carro leh:
“Dhageyso, hada ayaan ku sheegay” ayuu Rooney ku jawaab celiyay, “Waxaan
diirada saarayaa kubadeyda taasoo aan soo sameynayay xagaagii oo dhan.”
Laakiin Rooney ayaa u muuqday ciyaarta ka dib mid qorsheynaya inuu waqti
dheer sii joogo Old Trafford, isagoo bogiisa Twitter ku soo qoray:
“Natiijo weyn caawa. Sharaf ayay ii tahay inaan 200 goolal u dhaliyo
Manchester United. Waxaana rajeynayaa in intaas ka badan aan u dhaliyo.”