Liverpool ayaa guul ka gaartay kulankeedii labaad ee fasaxa ay xagaagan ku mareyso Asia Iyo Australia ka dib markii ay 2-0 kaga badiyeen kooxda Melbourne Victory ee horyaalka Australia ka dhisan iyadoo Suarez uu gacan ka geystay midka mid ah goolashaas.
Ciyaartaan ayaa aheyd mid ka dhacday garoonka weyn ee MGC, waxaana soo xaadiray in ka badan 95 kun taageerayaal ah oo doonayay inay mar uun arkaan kooxda ay taageeraan oo gurigooda ku ciyaareysa.
Liverpool waxaa hogaanka u dhiibay qeybtii hore ee ciyaarta kabtan Steven Gerrard kaasoo si sahlan kubada shaqaba u cusjiyay, waxaana qeybtii hore lagu kala nastay goolkaas.
Luis Suarez oo mustaqbalkiisa kooxda uu mugdi weyn ku jiro ayaa gashaday maaliyada Liverpool markii ugu horeysay tan iyo markii lagu ganaaxay 10ka kulan ka dib qaniinyadii Ivanovic.
Waxaana uu bedel ku soo galay ciyaarta oo dhiman 20 daqiiqo, waxaana uu gacan ka geystay goolkii labaad ee dhashay daqiiqadii 2aad ee labo daqiiqo oo ciyaarta lagu daray oo uu dhaliyay Iago Aspas. Laakiin Suarez ayaa jawigiisa uu ahaa mid aan aheyn sidiisii hore.
Liverpool ayaana aakhirkii Melbourne Victory kaga badisay 2-0, taasoo ah guushoodii labaad ka dib markii ay sidoo kale ka soo talaabsadeen Xiddigaha Indonesia. Socdaalkooda xiga waxa ay ku tagi doonaan Thailand.