Gonzalo Higuain iyo Pepe Reina ayaa ku sugan Italy si ay tijaabada caafimaadka u maraan ka hor inta aysan si rasmi ah ugu biirin kooxda Serie A ka dhisan ee Napoli.
Weeraryahanka Argentina ayaa Napoli ay kula heshiisay saxiixiisa Real Madrid adduun lacageed oo gaaraya 37 milyan euro, waxaana maanta oo arbaco ah uu ka soo degay Rome.
Gooldhaliyahan ayaa tijaabada caafimaadka ku mari doona Villa Stuart Clinic oo ku yaala caasimada Talyaaniga.
Higuain ayaa la rumeysan yahay inuu sannadkii 6 milyan euro ka qaadan doono Napoli mushar ahaan taasoo hal milyan euro ka badan lacagta uu mushahar ahaan sannadkii uga qaadanayay Real Madrid.
Napoli ayaa saxiixa Higuain ka afduubatay Arsenal oo mar sii horeysay xagaagan ku dhaweyd inay ciyaaryahanka la soo wareegaan iyagoo weliba heshiis shaqsi ah la gaaray xiddiga reer Argentina.
Dhanka kale goolhaye Reina ayaa isna isla xaruntaas caafimaadka tijaabada caafimaadka ugu mari doona kooxda tababarihiisii hore Rafa Benitez ee Napoli, isagoo heshiis amaah ah uga soo dhaqaaqaya Liverpool.