Safiirka Maraykanka iyo Madaxweynaha Somaliland[/caption]Hargeysa(GNA)-Safiirka Dawladda Maraykanka ee dalka Soomaaliya ayaa booqasho ku yimi Magaalada Hargeysa ee Caasimada Somaliland.
Weftigan waxa hogaaminaya Haweenayda ku-xigeenka u ah Hay’adda Maraykanka u qaabilsan Mucaawimooyinka ee USAID, waxaanay qasriga Madaxtooyada Somaliland kulan ku yeesheen madaxweyne Siilaan iyo Golihiisa xukuumadda.
Kulanka ayaa intii uu socday albaabadu u xidhnaayeen, hase yeeshee Wasiirka Arrimaha Dibada Somaliland Maxamed Biixi Yoonis iyo labada xubnood ee weftiga maraykanka oo Warbaahinta la hadlay kulanka kaddib, ayaa sheegay inay ka wada hadleen sidii ay Dawladda Maraykanku u xoojin lahayd Kaalmada dhinac horumarinta ee ay siiso Somaliland.
Wasiirka Arrimaha Dibada Maxamed Biixi, ayaa sheegay inay soo dhaweynayaan wada-shaqaynta siyaasaddeed iyo Taakulooyinka ay dawladda Maraykanka siiso Somnaliland , doonayaana in loo kordhiyo Mashaariicda ay Hay’adda USAID ka fuliso Gobolka.
Ku-xigeenka hay'ada horumarka Maraykanka ee loo yaqaan USAID, Miss Etim Linda oo iyadana kulanka kaddib hadal jeedisay, ayaa balanqaaday inay Hay’adda USAID sii wadi doonto Taageefada ay Gobolka ka waddo ee dhanka horumarinta.
Waxa ay sheegtay inay tahay markii ugu horaysay ee ay Somaliland timaado, isla markaana ay indhaheedu qabteen waxyaabo badan oo soo jiitay ama cajab geliyey.
Ergayga gaarka ah ee Dawladda Maraykanka u qaabilsan Soomaaliya Ambasaddor James P. McAnult, oo isna Shir-saxaafadeedka wada jirka ah ka hadlay, ayaa daboolka ka qaaday inay si fiican ula shaqaynayaan Somaliland, dhiiri-gelinayaana horumarinta Kaabeyaasha Dhaqaalaha iyo adeegyada Bulshada.
James P. McAnult, ayaa intaasi inuu mar hore booqasho tan la mid ah ku yimi Somaliland, isla markaana uu Dawladda Maraykanka u gudbiyay xaqiiqada dhabta ah iyo baahiyaha ka jira halkan, taasoo uu sheegay inuu Washington kala hadlay sidii kaalin mug leh ay uga qaadan lahayd horumarinta Gobolka.Halkan ka dhegeyso Warbixinta labada dhinac:
[audio mp3="http://www.gobanimonews.com/wp-content/uploads/Codka-Kulanka-Weftiga-USAID.mp3"][/audio]
Inkasta oo aanay jirin warar madaxbanaan oo laga helay Kulanka dhex maray Safiirka dawladda Maraykanka iyo Madaxweynaha Somaliland , hadana sida ay labada dhinacba ka dhawaajiyeen shirkan , ayaan lagu soo qaadin wax khuseeya siyaasadda iyo qadiyada Somaliland ee dhanka Ictiraafka.
Xukuumadda Somaliland ee uu hogaaminayo Madaxweyne Siilaanyo, ayaa inta badan Dawladdaha waaweyn ee Caalamka waydiisata Kaalmooyin dhaqaale iyo Mashaariic, meeshana ka saartay Ololihii Ictiraaf raadinta dalka oo ay dawladihii ka horeeyay Iskaashi kala samayn jireen wadamada saameynta ku leh qadiyadaha caalamka.