Hargeysa, (GNA) – Musharax Maxamed Cismaan Cabdi (Juudaan) oo ka mid ah aqoonyahanada reer Somaliland ee Qurba-jooga ah ayaa si rasmi ah ugu dhawaaqay inuu u taagan yahay doorashada golaha Wakiilada Somaliland ee la filayo inay dalka ka qabsoonto sanadka dambe ee 2015-ka kaas oo cadeeyey inuu iska soo sharixi doono gobolka Maroodi-Jeex.
Isagoo intaa ku daray in bulsho badan ay ku dhiirigalisay inuu isku soo taago doorashada golaha Wakiilada Somaliland tilmaamayna inuu dib ka soo sheegi doono xisbiga uu ka soo tartami doono.
Musharax Maxamed Cismaan Juudaan waxa uu sidaasi ku sheegay mar uu maanta xog-waraysi khaas ah siiyey Radio Hilaac.
Musharax Maxamed Cismaan Juudaan oo arimahaasi ka hadlayaana waxa uu hadalkiisa ku bilaabay “Waxaan Maanta doorbiday inaan si rasmi ah ugu dhawaaqo inaan isku taagi doono musharaxnimada doorashada golaha Wakiilada Somaliland ee la filayo inay dalka ka qabsoonto sanadka 2015-ka kadib markii aan arkay bulsho badan oo ehel iyo asxaab ka kooban oo dhamaantood ka soo wada jeeda Somaliland isla markaana ay igu dhiirigaliyeen inaan isku soo taago musharaxnimada doorashada golaha Wakiilada Somaliland markii aan aniguna shaki la’aan is qaniciyey inaan xilkaasi ku soo bixi karo hadii alle qadaro. Ayaa waxaan go’aansaday inaan aqbalo bulshada badan ee ii soo jeedisay inaan isku taago musharaxnimada doorashada golaha Wakiilada.
Sidaa darteed waxaan bulshada reer Somaliland ee dalka gudihiisa iyo daaficiisaba ku kala dhaqan iyo guud ahaannba taageerayaashayda ku dhaqan gobolka maroodi jeex u cadaynayaa inaan u taaganahay musharaxnimada doorashada golaha Wakiilada Somaliland, waxa kale oo aan halkan baaq uga jeedinayaa golaha Wakiilada Somaliland ee xiligan fadhiya oo aan ku guubaabinay inay sameeyaan oo ay abuuraan xeerkii lagu soo dooran lahaa golaha Wakiilada cusub ee badali doona golohoodan fadhiya oo aan ilaa hada xeerkii samaysnayn, sidaa darteed maadaama oo aan ka mid ahay musharaxii ugu horeeyey ee isagu baaq u jeediya golaha Wakiilada Somaliland ee ku guubaabiya xeerka doorashooyinka ee golaha Wakiilada waa inay tixgaliyaan soo jeedintaydaasi si markaasi ay doorashadii golaha wakiiladu Somaliland inoogu qabsoonto xiligii loogu talo galay.
Waxa kale oo aan halkan baaq uga jeedinayaa iyagana Komishanka cusub ee doorashooyinka qaranka ee golaha wakiiladu ansixiyeen inay iyaguna xilkoodaasi ku wajahan doorashooyinka ay iyaguna guntiga dhiisha iskaga dhigaan, anoo ilaahay uga baryaya inuu xilkoodaasi u fududeeyo”.
