Hargeysa(GNA)-Afar xubnood oo ka mid ah hogaanka Ururka Dhalinyarada Jiidali ayaa xabsiga laga soo daayay saddex todobaad kaddib.Guddoomiyaha Ururkaasi ayaa xidhnaa tan iyo badhtamihii Bishii ina dhaaftay ee October.
Afhayeenka Ururka iyo laba xubnood oo kale oo uu ka mid yahay Xoghayihii Guud, ayaa iyagana laba todobaad ka hor laga xidhay kulan uu Ururku ku qabsanayay Hudheelka Crown.
Afartan xubnood ayaa dhamaantood xoriyadooda loo soo celiyay, sida ay Gobanimonews u xaqiijiyeen xubno ka mid ah oo Wariyeyaashu kula kulmeen Suuqa iyadoo markaasuun la soo daayay.
Dhalinyarada la soo daayay ayaan si rasmiya warbaahinta uga sheegin sida ay soo dayntoodu ku timi iyo in maxkamaddu soo deysay toona, hase ahaatee qaar ka mid ah ayaa laga soo xigtay in laga soo daayay Laanta C.I.D-da oo aan wax maxkamad ah la geynin.
sidoo kale ma jiro wax war ah oo ka soo baxay Xukuumadda oo la xidhiidha soo deynta Dhalinyarada.
Asxaabta Mucaaridka ah, Ururrada u dooda Xuquuqda Aadamaha iyo qaybo ka mid ah Bulshada rayidka ayaa si kulul u cambaareeyay xadhiga Dhalinyarada oo la aaminsanyahay inay dawladdu u xidhay arrimo siyaasaddeed, kaddib markii sida muuqata ay ka shakiday inay dhaqdhaqaaqooda bilowga ah Taageero ugu samaynayaan Asxaabta Mucaaridka.
Guddoomiyaha Golaha Wakiillada ahna Guddoomiyaha Golaha Wakiillada, ayaa khamiistii la soo dhaafay Xukuumadda ugu baaqay in Shuruud la'aan lagu soo daayay dhamaan Dadka u xidhan cadaadiska Siyaasaddeed ee dawladdu waddo, isagoo si gaar ah u magac dhabay Dhalinyartan maanta la soo daayay.
Xadhigan qiddada lahayn ee lagula kacayo Dadka rayidka ah ee ka soo horjeesta ama loo arkaba inay dhaliilsanyihiin Siyaasadda Xukuumadda, ayaa sawir khaldan ka bixiyay nidaamka Dimuquraadiga ah ee ay Somaliland Balanqaaday , iyo xoriyaadkii Aasaasiga ahaa ee uu Dastuurka Shacabka siiyay.