Jilib(GNA)- Ugu yaraan shan ruux oo rayid ah ayaa lagu soo waramayaa inay ku dhaawacmeen duqeymo ay diyaarad dagaal ka geysatay deegaanka Fara-gurow oo illaa 3-km dhinaca galbeed kaga toosan degmada Jilib.
Dadka dhaawacmay waxa la xaqiijiyay inay ku jiraan Nin waayeel ah iyo Ilmo Carruur ah oo uu dhalay , laba Haween ah iyo Qof yar oo Carruur ah oo kale.
Degmada Jilib ayaa waxa maamul ahaan gacanta ku haya Xooggaga Al-shabaab.
Wararka imanaya Deegaankan ayaa ku waramaya in dayaaradan ay dhowr gantaal ku dhufatay degaanka ay duqaysay.
Xoogag taabacsan Al-shabaab oo ku hubeysan gaadiidka dagaalka ayaa soo buuxiyey degaanka Fara-gurow kaddib markii ay duqeyntu dhacday.
Waxaanay halkaas ka sameeyeen dhoolatus milateri oo ay ku muujinayaan iney diyaar u yihiin dayuuradaha soo weeraraay iney la dagaalamaan.
Ma jirto cid sheegatay Diyaaradan duqeynta geysatay, balse Dawladda Kenya ayaa hore u sheegatay duqeymo dhawr maalmood ka hor ay diyaarad kale ka geysatay degmada Maanyo hoose oo Gobolka ka tirsan.
Milateriga Kenya ayaa ka mid ah hawl-galka AMISOM, waxaanay taasi sababtay culays dhanka ammaanka ah oo dalkaasi gudihiisa ka soo kordhay.
Gobanimonews
Muqdisho Office
Email: editor@gobanimonews.com