Hargeysa (GNA) Wasiirka Wasaarada Madaxtooyada Somaliland mudane Xirsi Cali xaaji Xasan ayaa shalay xadhiga ka jaray 5 kiilo mitir oo ka mida dhismaha waddada cad oo ay xukuumadu dhistay, iyada oo wasiirkuna uu Dhagax Dhigay 5 kiilo mitir oo kale, taas oo ay hirgalin doonto xukuumadu, halka toban kalena ay dhisi doonaan beesha degta deegaankaasi.
Xafladan Xadhiga laga jarayay oo ka dhacday Duleedka magaalada Toon ayaa waxa kasoo qayb galay wasiirka madaxtooyada, wasiirka warfaafinta, wasiiru dawlaha Madaxtooyada somaliland, suldaanka guud ee beesha, xildhibaano ka socda golaha wakiilada iyo gudida wadada gacanta ku haysa.
Ugu horeyn munaasibada waxa hadal kasoo jeediyay guddoomiye ku xigeenka gudidda dhismaha wadada cad Sh. Maxamed Cali Geedi waxaanu yidhi “Waxa maanta farxad wayn inoo ah inuu nala joogo wasiirkii wasaarada madaxtooyada somaliland mudane Xirsi Xaaji Cali Xasan iyo wasiiradii kaleba taas oo aynu dhagax dhignay 15 toban Kiilo Mitir oo danbe, Shan waxa dhisaysa Dawlada Tobana waxa dhisaysa Beesha, Markaas marka la isku daro 15kaas kiiloo Mitiri, Wadadu waxa ay gaadhaysaa Qool Caday oo ah bankii, waxaanu aad ugu mahad naqaynaa dawlada oo ku sii jeeda dhinacii waxqabadka, waxa ay nasiisay 5kiilo mitir oo Hore Maantana waxa ay nasiinaysaa 5 danbe waxaan leenahay dawladan mooyaane mabaanaan arag dawlada kale oo wax qabanaysa.
Gudoomiye ku xigeenka guddida dhismaha waddada cad Sh. Maxamed Cali Geedi oo hadalkiisa sii wata ayaa waxa uu intaasi ku daray “Umadahu waxa ay isku dhaafaan Himilada iyo wax qabadka inaguna hadaynu nahay beeshii hawshaas aynu galnay ee ah wadada inuu ilaahay inala qabto,waxaanan halkan uga mahad naqayaa cidii wadadaas wax ku darsatay kuwa kale ee Iyana doonaya in ay wax ku darsadaan waanu soo dhawaynaynaa waxaanan leenahay wax wada qabsigu waxa uu ku jiraa is kaashiga iyo in lawada midoobo.
Dhinac waxa isna munaasibada hadal kasoo jeediyay xildhibaan Axmed Maxamed Diiriye Nacnac waxaana uu yidh “Runtii si aad ah Ayaan ugu ducaynayaa labada wadaba, kolay marka la isku daro awooda dawlada iyo ta shacabkaba wax ayaynu qabsan karnaa, laakiin inta uu nin waliba lacagtiisa yar la yuururo, meelna gaadhi mayno horumarna haba sheegin. waxaan anigu idin kula talin lahaa inaad waxaad haysaan wadadiina u hurtaan dawladuna markasta waydin garab taagan tahay, markaad wax qabsataana wax ayay idiinku daraysaa.
suldaanka guud suldaan Maxamed suldaan C/qaadir oo isna munaasibadaas ka hadlay ayaa xukuumada talada dalka haysa ee uu hogaaminayo madaxwaynaha somaliland Axmed Maxamed Maxamuud siilaanyo ku amaanay kaalinta muuqata ee ay kaga jirto waxqabadka dalka, isla markaasna qofkasta oo wax keensada wax ugu daraysa, waana wax ilaahay loogu mahad naqo. xukuumada talada dalka haysana waa xukuumadii wax qabadka, laakiin xukuumadihii ka horeeyay waxa ay ahayeen qaar iyagu isku filan uun, laakiin tani waa cid walba deeqa.
Dhinaca kale waxa isna munaasibada hadal kasoo jeediyay wasiirka wasaarada warfaafinta dhaqanka iyo wacyi galinta somaliland Cabdilaahi Maxamed Daahir Cukuse waxaanu ku dheeraaday muhiimada ay wadadu ugu fadhido bulshada degta degaamada ay ku socoto wadadu waxaanu yidhi “Degaankani waxa uu madaxwaynaha somaliland mahad gaar ah ugu hayaa sida uu markasta ugu dadaalo waxna ugala qabto iyo sida ay xukuumadu markasta ugu dhiirato sidii ay wax ugu qaban lahayd beesha, waxaan u sheegayaa shacabiga iyo deegaanka siiba inta kale ee wax ka gaysan kartaba in gacan midaysan ku qabtaan wadadana dhamaystiraan.
Gabo Gabadii waxa munaasibada soo gunaanaday wasiirka wasaarada madaxtooyada somaliland mudane Xirsi Cali Xasan waxaanu hadalkiisa ku bilaabay “Runtii aad Ayaan ugu faraxsanay wadadan iyo sida wanaagsan ee loo wadaba, waxaanan leeyahay halkaasi kasii wada oo dadaalkaasi yaanu idinka xumaan Ayaan idin leeyahay, waxaanan aad Iyana ugu mahad naqayaa guddida wadada oo Iyana dadaal badan iyo juhdi badan galisay, waxaana muuqata inaad labaatan kilo mitir iyo shanti aad dhamayseen, anagu ka dawlad ahaan sidaad u dadaashaan ayaanu idiinla dadaalaynaa.