Xildhibaano ka tirsan Baarlamaanka Soomaaliya oo ka soo jeeda Gobolka Shabeelaha Hoose ayaa ku eedeeyay Madaxweyne Xasan Sheekh inuu wax ka qaban waayay colaada soo noq-noqotay ee ka aloosan deegaanada Gobolka. C/llaahi Cumar Abshirow oo ka mid ah xildhibaano shalay ku kulmay magaalada Muqdisho ayaa ku eedeeyay madaxda dowladda in ay wax ka qaban ilaa iyo hada dagaalada ka socda Shabeelaha Hoose. Ilaa iyo hada madaxweynaha dalka wali kama uusan hadlin dagaalada, iska daa in wax laga qabtee, hadey u badato cambaareyn kaliya ayaa ka soo yeereysa, waa in tallaab qaadaaâ ayuu yidhi Xildhibaan Abshirow. Xildhibaanka oo sii hadlayay ayaa sheegay in hadii xaalada gobolka ay sidan ku sii socoto ay Madaxweynaha ay ka geyn doonaan Baarlamaanka mooshin ka dhan ah. Dhinaca kale Xildhibaanka oo u hadlay xildhibaanada shiray ayaa ugu baaqay dowladda in meelaha lagu dagaalamay ay geyso Ciidamo isku dhaf ah oo laga keeno Gobolada dalka, oo aan aheyn ciidamada heyb ahaan u dagaalamaya ee ku jira ciidanka dowladda. Waxaan codsaneynaa in ciidamada isku dhaf la geeyo meelihii lagu dagaalamay, in laga keeno Hiiraan, Bakool iyo gobolada kale, si xiisada loo dejiyo, waxaan difaaceynaa shacabka Gobolka in aanay wax dhibaato ah loo geysanâ ayuu yidhi Xildhibaan Abshirow. Waxaa soo baxaya dhaliilo loo jeediyo madaxda dowladda Soomaaliya oo ku aadan in aanay waxba ka qaban colaada raagtay ee ka taagan gobolka, tiiyoo hubka lagu dagaalamayo iyo gaadiidka dagaalka uu yahay midka dowladda Soomaaliya.
