Thursday, June 12, 2014

Shirwaynihii Beel Weynta Arab Uga Socday Magaaladda Baligubadle Oo Si Habsami Ah Maalintiisii 3aad Galay Iyo Guddiyo Muhiim Ah Oo La Ansixyey


 




Shirwaynihii  Beel Weynta Arab Ee Magaaladda Baligubadle KUgu Socda Oo Si Habsami Ah Maalintiisii 3aad Galay Iyo Guddi Muhiim Ah Oo La Ansixyey




 




Shirweynahii Beelweynta Arab uga socday Magaaladda Baligubadle ee Gobolka Hawd,ayaa si habsami ah uga socda halkaasi galeyna maalintiisii 3aad,waxana Shirweynahaasi lagu doortay  Guddi ka shaqayn doonta horumarinta Gobolka Hawd, iyada oo dhinaca kale  la ansixiyey Guddida Wadooyinka ee isku xidhi doonta wadada Baligubadle ee xarunta gobolka Hawd.




Shirweynaha  Beelweynta Arab uga socday Magaaladda Baligubadle ee Gobolka Hawd oo ay ka soo qabeygaleen Siyaasiyiinta deegaankaasi ka soo jeeda,Madax dhaqameed iyo Cuqaal,Aqoonyahan,Dhalinyar,Haween iyo Guud ahaanba qaybaha kala duwan ee Bulshada deegaankaasi ka kooban yihiin,ayaa waxa kale oo Shirkaasi lagu Ururiyey lacag badan oo lagu dhisi doono Jidka Hargeysa iyo Baligubadle isku xidhi doona oo ilaa socda hada.




 “Guddida la magacaabay waa Guddida Horumarinta Gobolka, waxay ka shaqayn doonaan Caafimaadka, Biyaha, wadooyika, deegaanka iyo Tacliinta. Waxaa Shuruud u ah Guddiga in Nin kastaaba isku filan yahay oo aqoon iyo Maalba leeyahay, waxaanay ka kooban yihiin 21 Xubnood, waxayna dhamaantood Guddidaasi ka shaqayn doontaa Horumarka Gobolka, Guddida Wadooyinka waa la ansixiyey kuwa kalena waa la meel marin doonaa.” Waxa sidaasi  yidhi Xildhibaan Axmed Maxamed Diirey (Nac-nac) oo u waramayay warbaahinta ku sugan magaalada baligubadle.




Xildhibaan Axmed Diiriye Nac-nac waxa aanu sheegay in Shirkaasi yahay Mid ka madax banaan siyaasad, laguna lafo gurayo Horumarinta Beesha iyo Gobolka Hawd. Waxa uu sheegay in Lacag badan loo Ururiyey Waddada Hawd iyo Hargeysa xidhiidhisa “ Qof kastaaba wuxuu noo dhiibay wixii uu hayay, qofbaa bixinaya Kun Doolar, mid baa bixinaya Boqol Doolar, labadii cisho ee u dambeeyay Lacagta aanu Ururinay ma qiyaasi kartid” ayuu yidhi Xildhibaan Nac-nac.




Dhinaca kale Gudoomiyaha Golaha Wakiilada Somaliland, ahna Gudoomiyaha Xisbiga Mucaaridka ah ee Waddani Waddani Cabdiraxmaan Cirro oo maanta ka hadlayay Munaasibad xisbigiisu ku qabsaday Hargeysa ayaa hambalyo u diray Shirka Beesha Baligubadle “ Waxaan Hambalyeynayaa Beelaha Somaliland ee Gobolka Hawd Shirka halkaasi uga socda, waxaanan u rajaynayaa inuu guul ugu soo dhamaado” ayuu yidhi Cabdiraxmaan Cirro.




Wariye Mr Hudle




 




Gobanimonews@gmail.com




 




Gobaninews/Hargeysa Office/Somaliland