Reysal-wasaare Sheikh oo Addis ka soo laabtay, furayna Shirka New deal ee saddexaad
Muqdisho, 12,June, 2014(GNA)-Ra’iisul Wasaaraha Xukuumadda Federaalka Soomaaliya mudane Cabdiwali Sheekh Axmed ayaa saaka furay shirka saddexaad ee Higsiga Cusub ( New Deal) oo ay ka soo qayb galeen xubno ka tirsan golaha Wasiirada, qaar ka mid ah safiirada beesha caalamka, Wakiilka Midowga Yurub ee Soomaaliya, iyo Hay’adaha Qaramada Midoobay.
Cabdwali Sheikh Maxamed Axmed ayaa shirkan furay, kaddib markii uu isla maanta Safar kaga soo laabtay dalka Itoobiya oo uu kaga qayb-galay Shirkii 26 ee Urur Goboleedka IGAD oo habeen hore lagu soo gabagabeeyey Magaalada Addis-ababa.
Ra’iisul Wasaaraha Xukuumadda Soomaaliya Cabdiwali Sheekh Axmed oo khudbad ka jeediyay shirka ayaa ku dheeraaday Qorshaha sannadka 2014-ka ee Soomaaliya iyo dadaalka ay muujisay Xukuumaddu, waxaanu soo jeediyay in shirka laga soo saaro waxyaabo ka turjumaya geedi socodka hanaanka qorshaha la dejiyey.
Ra’iisul Wasaare Cabdiwali Sheekh Axmed ayaa sheegay in Xukuumadda Soomaaliya ay samaynayso dadaal wax looga qabanayo tacadiyada haweenka iyo dadka laga tira badanyahay si loo gaaro Soomaaliya oo nabad ah. 
“Shaki kuma jiro in aan u baahanahay in caalamku gacan naga siiyo sidaan uga soo kaban lahayn colaadaha dalka ragaadiyay, aana u hiigsan lahayn horumar, bulshadeenana u daryeeli lahayn . Sidaas daraadeed, waxaan doonaynaa inaan samayno qorshayaal cad-cad oo arrintaas lagu wajahayo si taageeradoodu u noqoto mid wax tar leh.” ayuu yiri Ra’iisal Wasaaruhu.
Isagoo sii hadlaya wuxuu yiri “Maanta waxaan mareynaa marxalad shacabka iyo dowladdu ay diyaar yihiin in dalka dib loo dhiso, si ay shacabka Soomaaliyeed u helaan fursado shaqo, waxbarasho, caafimaad iyo dhammaan adeegyada bulshada. Aad iyo aad baana uga mahadcelineynaa Midowga Yurub dadaalkooda oo rajo weyn nagu abuuraya”.
Dhinaca kale xubno u hadlay deeq-bixiyeyaasha kulanka ka soo qeyb-galay, ayaa soo dhaweeyay qorshaha ay dawladdu dejisay.
Qorshaha New deal-ka ayaa ah hab heshiis ku dhisan hanaanka loo maamulayo deeqaha soomaaliya la siiyo.
Gobanimonews
Muqdisho Office
Email: editor@gobanimonews.com