Guddoomiyaha Guurtida oo laga dalbaday in la sii daayo Dad wali xidhan Khilaafka Xisbiga iyo inay xukuumaddu joojiso Ololaha
Hargeysa(GNA)-Garabka Xisbiga Kulmiye ee Guddoomiyaha Xisbiga la safan ayaa Guddidii Guurtida ee dhexdhexaadinta ka galay khilaafka u gudbiyay magacyada dadka wali xidhan ee sidii lagu heshiiyay la soo dayn lahaa.
Ilo-wareedyo Gobanimonews ka heshay garabka Muuse Biixi ayaa sheegay in dadkaasi Magacyadooda loo gudbiyay Guddoomiyaha Golaha Guurtida oo arrinta oday ka ahaa, iyadoo ka hor intaan loo gudbin lagu war geliyay inay wali dad u xidhanyihiin Khilaafka.
Inta la hubo siddeed qof oo ka mid ah dadkii la qabtay mudadii uu loolanku kululaaday,kuna jiro wasiir ku-xigeenkii hore amniga oo siyaasiyan eeddo uu xukuumadda u jeediyey lu duray wasiirro, ayaa wali xabsiyada Mandheera iyo Gabiley Baaqi ku sii ah.
Dadkaasi ayaa sida muuqata waxa loo samaynayaa eedo lagu Maxkamaddeynayo, inkasta oo aanay xukuumaddu caddeynin sababta loola hadhay.
Dhinaca kale, labada dhinac ee heshiiska la dhex dhigay, ayaa sida muuqata jabiyey laba qodob oo ka mid ah soo jeedintii Guurtida, kuwaasoo kala ah:-
inaan inta la gaadhayo xili doorasho la samaynin wax olole ah oo labada dhinac ku muujinayaan Musharaxnimadooda.
in la sii daayo dadka loo xidhay khilaafka.
Masuuliyiin Xukuumadda ka tirsan ayaa intii muranka la dejiyay, soo abaabulay dad Taageeraya Musharaxnimada Madaxweyne Siilaanyo.
Odayaal dhaqameedyo iyo siyaasiyiin kala duwan ayaa la arkayay iyagoo maalmihii la soo dhaafay warbaahinta ka Taageeraya Madaxweyne Siilaanyo.
Dhinaca kale, dad Taageersan Guddoomiyaha Xisbiga Muuse Biixi Cabdi Musharxnimadiisa kulamo ku qabsaday Habeenadii la soo dhaafay Magaalada Hargeysa.
Dhaqdhaqaaqyada noocan ahi waxay u muuqdaan kuwo dib u kicinaya xanuunkii Xisbiga kala erdheeyey ee ay Guddida guurtidu xumad jabinta ku muddeen.
Inkasta oo sida muuqata dhinacyada xisbiga ee Madaxweynaha iyo Guddoomiyuhu kala hogaaminayaan sii kala fogaanayaan , hadana waxa tibaaxo Gobanimonews heshay sheegayaan inay Madaxtooyada caawa ku kulmeen, isla markaana isku soo dhawaanshiyo isku muujiyeen.
Madaxweyne Siilaanyo ayaa maalmihii la soo dhaafay Ergo u diray Guddoomiye Muuse Biixi Cabdi, isagoo ka dalbaday inay foolka fool u wada fadhiistaan.
Madaxweynaha ayaa la sheegay inuu si dhul isu dhigis ah ugu ergooday Muuse Biixi, laakiinse warar soo baxayay goor sii horaysay waxay sheegeen in Muuse Biixi diiday ergada Siilaanyo u soo diray.
Dhinaca Xisbiga kulmiye isku haya hadii ay fuliyaan go’aamadii lagu dhexdhexaadiyay iyo hadii aanay fulinba waajahaya caqabad aad u adag oo mugdi gelinaysa Mustaqbalka Xisbiga.
Go’aamadii lagu dhexdhexaadiyay ayaa u eeg kuwo aan Maslaxad badan keenahayn.
Gobanimonews
Hargeysa Office
Email: editor@gobanimonews.com