Dadka la qabqabtay waxa ka mid ah laba ka mid ah Shaqaalaha Xawaalada Jubba iyo Shirkadda Telesom
Hargeysa(GNA)-Ciidanka Bilayska Somaliland ee ka hortaga Argagixisada, ayaa Magaalada Hargeysa ka qabqabtay 24-kii saacadood ee la soo dhaafay ilaa Lix Nin oo lagu tuhunsanyahay inay xidhiidh la leeyihiin Kooxaha Argagixisada ah, sida waxa Gobanimo u xaqiijiyey laamaha amniga ee Hargeysa.
Nin Shaqaalaha Xawaalada Jubba Express xarunteeda Hargeysa ka tirsan iyo Nin kale oo isna la sheegay inuu u shaqeeyo Shirkada Isgaadhsiinta ee Telesom, ayaa ka mid ah raga la qabqabtay,kuwaasoo xalay lagu qabtay Magaalada.
Ciidanka Bilayska ayaa Albaabada u xidhay Xarunta Shirkadda xili shaqadu socotay, waxaanay gudaha u galeen xafiiska, iyagoo baadhis ka fuliyay “waxay albaabada u laabeen xafiiska, kaddibna gudaha ayay u galeen, iyagoo hoosta ka soo xidhay, ilaa duhurkiina way ku jireen”sidaasi waxa Gobanimonews u sheegay qof goob-jooge ahaa.
Hase ahaatee Guddoomiyaha Shirkada Jubba Express Muuse Daahir Yuusuf oo Gobanimonews wax ka waydiisay sababta ciidanku xarunta shirkada u baadhay ayaa sheegay inaanay jirin baadhis lagu sameeyay hantida shirka iyo xafiiska toona, balse ay ciidanka xafiiska galay ay wadeen Ninka shaqaalaha ka tirsanaa oo qaybta qasnada ee xafiiska joogay, sidaasi darteed ay iyagu dalbadeen inuu u wareejiyo Fureyaashii Qasnada iyo xisaabaadkii uu hayay.
Muuse Daahir, ayaa intaasi ku daray inay Shirkaddu sideeduu u shaqaynayso, isla markaana markiiba la furay, isagoo caddeeyey inay sidii caadiga ahayd bulshada ugu addeegayso “shirkada Jubba Express way shaqaynaysaa sidii caadiga ahayd, wax dhibaato ahina ma jiraan, Nin ka mid ah Shaqaalaha oo sida naloo sheegay la tuhunsanyahay ayaa la xidhay, annagaana dalbaday in markii xalay la qabtay uu noo wareejiyo fureyaashii qasnada uu hayay”ayuu yidhi Muuse.
Ma jiro wax war ah oo ka soo baxay Taliska Ciidanka Bilayska iyo Wasaaradda arrimaha gudaha oo tafaasiil lagaga bixinayo hawl-galkan saameeyey xarumaha Ganacsiga ee Ciidanka qaaday 24-kii saacadood ee la soo dhaafay.
Hase ahaatee Saraakiil Bilayska ka tirsan ayaa Gobanimo u xaqiijiyey in dadka la qabtay lagu tuhunsanyahay inay xidhiidh la leeyihiin Kooxaha Argagixisada ah ee Geeska Afrika, waxaana warku intaasi ku daray in Ninka Xawaalada ka shaqaynayay la tuhunsanyahay inuu lacago u gudbiyay kuwo kale.
Waa markii ugu horeysay ee hawl-gal noocan ah duhur cad laga fuliyo goobo Ganacsi Magaalada Hargeysa, kaasoo lagu soo qabtay dad Argagixiso lagu tuhunsanyahay ama xidhiidh la leh.
Ciidanka Bilayska ee RRU-da ayaa hawl-galadii ugu dambeeyey ee ay fuliyeen todobaadyadii ugu dambeeyay waxay ku xidh-xidheen dad tiro badan oo ka mid ah Taageerayaasha Garab ka mid ah dhinacyada xisbiga Kulmiye u kala jabay.
Sidoo kale, waxa ay Habeen hore baadhitaano ka sameeyeen guryo Magaalada ku yaala.
La soco waraysi Maamulka Shirka Jubba Express bixi goor dhow…