Boqor Axmed Maxamed Xasan (Bad-madow), ayaa si adag uga soo horjeestay, dhaleeceeyayna hadal ka soo yeedhay xubno ka mid ah Madaxdhaqameedka reer Hargeysa oo taageeray Musharaxnimada Madaxweyne Siilaanyo.
Madaxdhaqameedyada Madaxweynaha Taageeray ayuu ku tilmaamay kuwo waji ku macaash ah, waxaanu sidaas ku sheegay Shir-jaraa’id oo uu ku qabtay Hargeysa.
“Anigoo ah Boqor Axmed Maxamed Xasan (Bad-madow),kana mid ah Madaxdhaqameedka Beelaha Habar-awal, waxaan halkan ka Caddeynayaa inaanay dib u dhacayn inay marba afar suldaan oo la soo adeegsaday kala jabiyaan Beesha aan ka soo jeedo, iyagoo dano gaar ah wata.”ayuu yidhi.
Waxaanu intaas ku daray “ sidaas darteed, Waxaan u sheegaynaa inaanu Talaabo ka qaadi doono Suldaanka dambe ee isku daya inuu kala qaybiyo Masiirka Beesha iyo midnimadeeda, talaabadaasoo ah mid beesha dhexdeeda lagaga qaadayo. Waxaanan u soo jeedinayaa inay Ilaaliyaan Madaxdhaqameedka Beeshu rabitaanka Bulshada ay metelaan.
Waxa kale oo aan Bogaadinayaa Haweenkii xalay shirka ku qabsaday Hargeysa ee taageeray Hoggaanka Xisbiga kulmiye”ayuu yidhi.
Waxa kale oo uu caddeeyey inaanu isagu ka soo horjeedin Musharaxnimada Madaxweyne Siilaanyo iyo ta muuse Biixi toona, arimahaasina yihiin kuwo labada Masuulba xaq u leeyihiin, balse uu diidanyahay in Magaca Beesha dhinac lagu Taageero.
Hadalkan ayaa daba socda, shir ay Maanta Magaalada Hargeysa ku yeesheen Odayaal dhaqameedyo sheegay inay metelayaan beesha Subeer-awal, kuwaasoo ku dhawaaqay inay Taageersanyihiin Xisbiga kulmiye iyo Musharaxnimada Madaxweynaha.