Hargeysa(GNA)-Askari ka tirsan Ilaalada Xabsiga Hargeysa ayaa toogasho ku dilay Nin rayid ah oo sida la sheegay hore uga tirsanaan jiray Ciidanka Asluubta.
Dilka ayaa ka dhacay caawa fiidnimadii meel wax yar u jirta Xabsiga, oo xagiisa dambe ah, kaddib markii sida la sheegay ay xabaddu si kama ah uga qarxaday Askariga Ciidanka oo hubaysnaa,kuna dhacday Marxuumka dhintay.
Sida uu Gobanimonews u xaqiijiyey sarkaal ka tirsan Ciidanka Asluubtu, Ninka dhintay ayaa dhaawac lagu geeyey Cisbitaalka Guud ee Magaalada Hargeysa, halkaasoo uu ugu dhintay dhaawaca soo gaadhay oo ahaa mid culus.
Ma jiro wax war ah oo ka soo baxay Taliska Ciidanka Asluubta iyo laamaha kale ee ammaanka toona oo la xidhiidha sababta keentay dilkan,hase ahaatee warku wuxuu intaas ku darayaa in gacanta lagu dhigay Askarigii dilka geystay, isla markaana baadhis socoto.
Xabsiga dhexe ee Hargeysa oo ku yaala meel magaalada dhexdeeda ah waxa laba bilood ka hor ka dhacay dhacdo sababtay dhimashada askar ilaalada ka mid ahayd, kaddib markii Koox Maxaabiis ah ay isku dayeen inay xoog kaga baxsadaan jeelka.
Waxaanay dhacdadani noqonaysaa tii labaad ee muddo kooban gudaheed ka dhacday xabsigan oo ay ku xidhanyihiin dad u xidhan dambiyo cul culus oo argagixiso iyo Budhcad badeednimo ka mid ah.