Go’aankii Guurtidu Madaxweyne Siilaanyo iyo Guddoomiyaha ku heshiisiisay wali ma qabyaa?
Dadka xidhan waxa ka mid ah Wasiir ku-xigeenkii hore ee amniga
Hargeysa(GNA)-8 ka mid ah Dadkii loo xidhay Khilaafka Xisbiga Kulmiye, ayaa la xaqiijiyey inay wali xabsiyada ku jiraan, xili saddex maalmood laga joogo markii lagu dhawaaqay Heshiiskii lagu xaliyey Khilaafkii ka dhexeeyay Garabyada Xisbigu u kala jabay ee ay kala hogaaminayeen Madaxweyne iyo Guddoomiyaha Xisbigaas Muuse Biixi.
Dadka la xidh-xidhay ayaa ka mid ahaa Taageerayaasha Guddoomiyaha Xisbiga iyo Garabkiisa, kuwaasoo qaar loo xidh-xidhay Sawirro Guddoomiyaha Musharaxnimadiisa lagu muujiyey, halka Wasiir ku-xigeenkii hore ee amniga iyo saddex Nin oo Ilaalo u ahaa loo xidhay kaddib Eeddaymo uu Xukuumadda u jeediyay.
7 ka mid ahaa maxaabiistaas ayaa la soo daayay maalintii go’aamada Guurtida la soo saaray, sida ay Gobanimonews u xaqiijiyeen xubno ka mid ah oo laga soo daayay Jeelka Mandheera.
Ma cadda sababta loo haysto 8 xubnood ee wali xidhan, ilaa hadana dawladda iyo garabkii Kulmiye ee ay ka tirsanaayeen wax war ah oo lagu caddeynayo ujeedada loo reebay kamay soo saarin, hase ahaatee sida ay Gobanimonews ka heshay ilo-wareedyo lagu kalsoonyahay, xubno Maxaabiista ka mid ah ayey xukuumaddu doonaysaa inay dacwado u gaar ah ku oogto.
Lix ka mid ah dadkan oo ku jira Xamsiga mandheera iyo todobada la soo daayay waxa la sheegay inaanay Hay’ada ammaanku wax baadhis ah ku sameyn, isla markaana inta la soo qabtay xabsiga loo dhaadhiciyay.
“waxay ku xidhanyihiin iyo sababta loola hadhay toona ma garanayno,waxna lama waydiin annaga iyo iyaga toona”sidaasi waxa yidhi mid ka mid ah 7 qof ee xoriyadooda dib u helay.
Magacyada dadka xidhan
Waxa ka mid ah xubnaha wali xidhan Muj. Quraysh Xasan oo ka mid ahaa Dhaqdhaqaaqii SNM ee dalka xoreeyey, Cumar Cabdi Buushe , Mustafe Dhamac Caabi, Muj. Mawliid Ibraahim Aadan (Mallo) iyo Wasiir ku-xigeenkii hore ee Amniga Cabdilaahi Abokor Cismaan iyo Saddexdii Nin ee gurigiisa laga soo qabtay oo midi dhaawac yahay.
Heshiis wali qabyo ah
sii xidhnaanshiyaha 8 qof ayaa qabyo ka dhigaya fulinta arimihii lagu heshiiyey oo si cad loogu xusay in ooda laga qaado dhamaan Maxaabiistii khilaafka loo xidhay.
Iyadoo sida ay Gobanimonews wararka ku heshay marka hore Guddoomiyaha Xisbiga kulmiye Muuse Biixi u aqbalaada in loo gar-naqo garabka Madaxweynaha Shuruud uga dhigay in dadkaa la soo daynayo.
Muuse Biixi ayaa sabtidii markii lagu dhawaaqay go’aamada guurtida sheegay inuu danta qaranka uga tanaasulay natiijo kasta oo soo baxday,isagoo caddeeyey inaan qodobada la soo saaray maslaxad u lahayn, isla markaana madaxweynaha garta loo xukumay.
Qodobada Heshiiska:-
1. In Go’aannadii ka soo baxay Shirweynihii 3aad ee Xisbiga KULMIYE oo ay soo saareen Shirguddoonkii Shirweynuhu, una gudbiyeen Madaxweynaha Jamhuuriyadda Somaliland, Guddoomiyaha Xisbiga, Xeer-ilaaliyaha Guud ee Qaranka, Guddoomiyaha Guddida Diiwaangelinta, isla markaanna ay Guddida Diiwaangelinta Ururadda iyo Asxaabta Qaranka ansixiyeen ay sidooda ayay dhaqangal u yihiin.
2. Inkasta oo u xaq u yeelan karo Madaxweynuhu iyo qof kasta oo dalka Madaxweyne ka noqdaaba in uu dhammaysto labadda teeram (muddo) doorasho ee Dastuurku u jideeyay, hasa yeeshe, in cid kasta oo ka mid ah Golaha dhexe ee Xisbiga KULMIYE oo buuxisa shuruudaha laga rabo qofka isu taagaya Doorashadda Jagadda Madaxweynaha uga tartami karo golaha dhexe ee KULMIYE dhexdiisa.
(a) Waxa reeban shacaa’ir kasta oo muujinaya astaan Murrashax ama doorasho ka hor inta aan la gaadhin wakhtiga ku muddaysan Xeerka Doorashadda Madaxweynaha iyo Madaxweyne-ku-xigeenka.
3. Wixi dad loo xidh-xidhay arrimo la xidhiidha khilaafka Xisbiga KULMIYE la sii daayo.”
Gobanimonews
Hargeysa Office
Email: editor@gobanimonews.com