Laascaanood(GNA)-Dhaqdhaqaaqyo Ciidan oo xoogan ayaa laga dareemayay deegaamada Gobolka Sool, labadii Maalmood ee la soo dhaafay.
Colaad ka qaraxda aagaas ayaa cabsi weyn laga qabaa taasoo ka dhalata dagaal dhex mara ciidamada Somaliland ee ku sugan Jiidaas iyo kuwa Maamulka la baxay Khaatumo heegan ugu jiray sidii ay u ilaali lahaayeen Shirka Maamulka khaatumo ee ka soca Taleex.
Ciidanka Somaliland ayaa lagu waramay inay ku durkeen Deegaamo kulaala taleex, halka kuwo Khaatumona abaabul la geliyey.
Ciidamada Somaliland ayaa hore Taleex uga qabsaday Khaatumo laba bil ka hor, kaddib weerar aan iska cabin lahayn oo ay ku qaadeen.
Dadka deegaanka ayaa Gobanimonews u sheegay in dhaqdhaqaaqyada socdaa waajihi karaan xiisad isku dhac ah, taasoo aan ahayn markii ugu horaysay.
Siyaasiyiinta Gobolka ka soo jeeda Somaliland jooga ayaa ku taliyay in talaabo Milateri lagu qaado Shirka ka socda Taleex oo ay sheegeen inuu xasarad abuurayo.
Laakiinse kuwa dhinaca Taleex ku sugan ayaa doonaya inay dhamaystiraan ujeedada shirka loo qabtay.
Shirka Taleex waxa ka qayb-gelay Reysal-wasaarihii hore ee Soomaaliya Cali Khaliif Galaydh oo hada ah Xildhibaan ka tirsan Baarlamanka Soomaaliya.
Shirkan ayaa la doonayaa in lagu dhiso maamul cusub oo bedela hogaankii hore ee Khaatumo, kaasoo noqonaya mid rasmi ah, sida uu Gobanimonews u sheegay Masuul ka tirsan dadka qayb-gelaya.
Ergooyinka ka qayb galay ayaa isaga kala yimi gudaha iyo dibada, laakiinse waxaan ku sugnayn xubno muhiim ah oo ka mid ah Isimda Gobolka.
Somaliland iyo Puntland ayaa labaduba u arka inuu Khatar ku yahay Shirkani, isla markaana deegaamada kala sheegta.
Hore ayaa looga digay colaad labada dhinac ku dhex marta halkaasi, taasoo salka ku haysa kala sheegada soohdinta labada Dawladdood.
Gobanimonews
Laascaanood Office
Email: editor@Gobanomonews.com