Dalabkii ay Liverpool ka gudbisay xiddiga Sevilla Alberto Moreno ee 16.2 milyan ginni ayaa ah mid hakad uu ku yimid ka dib markii kooxd Isbaanishka ah ay dalbatay in qeyb ka mid ah lacagtaas si kaash ah afka hore looga bixiyo.
Tababaraha Anfield Brendan Rodgers ayaa rajo ka qaba in daafaca bidix uu ka dhigto saxiixiisa seddexaad ee xagaaga, waxaana 21 jirkaan la filayay inuu u duulo Liverpool isagoo ay la socdaan aabihiis iyo wakiilkiisa shalayto.
Laakiin Sevilla ayaa riski gelisay in heshiiska uu burburo iyagoo wax ka bedelay qaabka lacag bixinta. Kooxda La Liga ka dhisan ayaa sidoo kale dooneysay inay lacago dheeri ah la siiyo haddii uu ciyaaryahanka guulo la gaaro Liverpool.
U wareegista ciyaaryahanka ayaa sidoo kale ku xirnaan doonta haddii Ivan Rakitic uu u dhaqaaqayo Barcelona, iyadoo Sevilla ay dooneyso inay lacag u hesho suuqa kala iibsiga ee xagaaga.
Moreno ayaa ka qeybgalay arooska xiddiga Liverpool Luis Alberto ee sabtidii, waxaana wargeyska Mundo Deportivo uu sheegayaa inuu halkaas ku maqlay war wanaagsan oo ku saabsan qolka labiska Anfield.