Dhamaan bulshada reer Somaliland iyo Bahweynta Saxaafadaba waan idin salaamay salaan dabadeed anigoon jeclayn inaan ku fogaado hadana waxaan dhawr erey oo koob kooban ka odhanayaa nin Faysal Qumuj la yidhaahdo oo lay sheegay inuu ka tirsan yahay 9ka gudida Fulinta ee ururka Saxaafda Somaliland ee SOLJA oo hadana habeen iyo maalin warbaahinta la taagan hadalo naxli iyo xumaan ah oo qabyaaladaysan isagoo ku hadlaya dhawr goor magaca reerna ka soo baxay warbaahinta, “Madaxweyne Waa Markayagii” waa erey uu aad ugu celceliyey habeen dhalinyaro ay huteel Crown Xaflad ku qabsatay, ta aan is weydiiyeybaa waxay ahayd isaga iyo dhawr nin oo kale oo ka soo muuqday warbaahinta waxaan ku ogaa xisbigii UDUB iyagoo aad ugu ololeeya.. ka dib waxaan is weydiiyey tolow ma markii UDUB ayay sheegayaan oo waa kaltan KULMIYE iyo UDUB ku heshiiyeen waayo dimuqraadiyada ayaa dhigaysa in ay tahay “One Man One Vote” oo cidina aanay cid ku xidhnayn balse mardanbaan ogaaday inuu ka hadlayo waa markii Beeshayada… Ceeb weynaa ilayn af aanad lahayn ma qabatid .. beesha kuma hadli karaan afkooda iyaga iyo intii ka agdhawayd midina waayo waa inta reerka gudihiisa aan waxba ka ahayn.. manaan arkayn wakiil reerihii waaweynaa ka jooga…
Hadana waxaan akhriyey qoraal kale oo uu soo qaatay Abwaan M.N.Fadal oo leeyahay Nimankaan dukaannada lukiyan, laba laba u siiyey
Nimankaan lo’daydii casayd, laanta ugu duugey
Wax la liqiyo xoolaba kuwaan, ugu laxaad yeelay
Ee aan lacagta jeebka ugu guray, lohonlohii caydha
Hadday aniga leebkiyo warmaha, ii lisanayaane
Waxaan odhan lahaa Faysalow Haday riyo dib leeyihiin futadooday ku qarin lahaayeen waxaanse kaa odhan lahaa erey M.N.Fadal kujiray gabaygiisii kale “Irbad dhuub ma galisaan afkuna waa idin dheeryahaye”
Dadka wallaalaha ah ee ilaahay ku wada uumay geyiga inaad dab ka dhex hurisaa aniga Faysalow way ila guracan tahay beeshaad ka soo jeedo waxaan u hayaa ixtiraam karaamo iyo sharaf waa beel aanad afkooda keligaa ku hadli Karin waa beel adigoo kale ay ku yar tahay runtiina taariikhda Somaliland baal dahaba kaga jirta .. labadan beelood ee aad kala wadaana waa JEEGAAN Heshiisay markaad adigu UDUB la shaqaynaysay ee biidhi qaataha u ahayd maantana kaa maarmi kara ka daa inaadeerow Gacaliye Xumaha aad dhexdooda ka wado
Sawkii Salaan Carabay lahaa maaha
Haddaad ficil hinaasiday asaad hiilin kari weydey
Ma afkaad ku hawl bixi cidlaad ka hanajabaysaaye
Hiinraaca waa lagu yaqaan hiida doqoneede
Hebednimada qaarkeed aday kuu hednoqotaaye
Dabkaad hurin habeen iyo dharaar halacyadaad oogi
Halna kuma xereyside dadkaad ku hawaraysaaye
Waxaan ku soo koobayaa maqaalkayga Faysalow hadaad reer iyo qabiil ku hadlayso bahda Saxaafada ha ceebayn ee xubinimada u dhig ilayn dhex ma noqon kartid kuwaad sheeganaysana waxba uma qaban kartid qaar kalena haba sheegin qabyaaladan iyo qudhunkan aad habeen iyo dharaar wax ka qoraysana bulshada ka daa oo Qaranka u adeeg.
Allaa Mahad Leh
Aadan Cabdilahi Guled
Adis-Ababa Ethiopia
Guuleed.aden@outlook.com