Muqdisho(GNA)-Ra’isiul Wasaaraha Soomaaliya Cabdi Faarax Shirdoon (Saacid) ayaa si rasmi ah u furay maanta shirkii dib-u-heshiisiinta Jubooyinka, kaas oo ay ka soo qayb galeen Ergooyinka ka kala socday qabybaha kala duwan ee dadka ku dhaqan gobolada Jubooyinka.
Shirka ayaa waxa goob joog ka ah xubno ka tirsan golaha Wasiirada, Safiirada Soomaaliya u fadhiya caalamka, UNSOM, Fanaaniinta Hobolada Waaberi, iyo kooxaha shirbka oo dadka ku maaweelinayey heeso muujinaya wadaniyad iyo dib-u-heshiisiin.
Ra’iisul Wasaaraha oo ugu horeyn halkaasi ka hadlay ayaa sheegay inuu rajo wanaagsan ka qabo in shirkaan uu noqdo mid u horseeda horumar dhamaan shacabka ku nool jubooyinka oo 22 sano ee la soo dhaafay ay haysteen dhibaatooyin kala duwan.
“Waxaan sharaf ii ah inaan si rasmi ah u furo shirkii Jubooyinka oo daba socda shirkii Addis-Ababa, waana shir leh muhiimad gaar ah mar hadii wax garadkii Jubooyinka ay halkaan ku dhanyihiin, waxaana rajaynayaa in shirkaan uu horseed u noqdo kalsooni dhisida maamul KMG ah ee Juba, kaas oo shaqaynaya mudo laba sano ah, hadii isfahamka dadka uu ku soo dhamaado intaas in kayar waxaa loo gudbayaa dhisida maamul gobleed ay yeeshaan dadka Jubooyinka, ka dowlad ahaan waxan diyaar u nahay inaan samayno dhamaan tasiilaadkii loo baahnaa oo dadka jubooyinku ku gaari lahaayeen isfam u horseeda nabad kuwada noolaansho” ayuu yiri Ra’iisul Wasaare Saacid oo dhanka kale sheegay in tiirarka asaaska u ah dowladda Soomaaliya uu yahay hirgalinta nidaamka Federaalisamka, heshiiska ay gaaraan dadka jubooyinkana uu unoqonayo gogol dhig asaaska dhisida maamul goboleedyada dalka.
Wasiirka Arrimaha Gudaha iyo Amniga Qaranka mudane Cabdikariin Xuseen Guuleed oo Gudoomiye u ah gudiga qaban qaabada shirka ayaa sheegay in shirkaan uu gogol xaar u yahay shirweynaha ka dhici doono magaalada Kismaayo kaas oo lagu gaari doono xal kama danabys ah.
“Waxaa aad ugu faraxsanahay inuu si habsami leh looga soo wada qayb galay shirkaan, wuxuuna shirkaan daba socdaa shirkii Addis-Ababa, wxuuna qayb yahay talaabooyinka la rabo in lagu dhameeyo mad-madowga ku dhexjira dadka Jubooyinka dega, waana muhiim in shirka uu ku bilowdo qalbi furnaan iyo in qof walba doonayo in xal la gaaro, arintaas kaliya ayaa ah mida ay ku imaan karto xal waara oo laga gaaro dhibaatooyinka soo noq noqday ee Jubooyinka” ayuu yiri wasiir Cabdikariin.
Dhanka kale Hogaamiyaha KMG ah ee Juba Sheekh Axmed Ismaalam ayaa dhankiisa qiray in loo baahan yahay in gogoshaan ay noqoto mid dadka isugu yimid ay ka kacaan iyagoo midaysan, taasna ay u baahantahay geesinimo iyo daacadnimo.
“Heshiiskii Adis-Ababa wuxuu ahaa mid muhiimad gaar ah leh, waxaana uga mahadcelin dowlada Ethiopia Wasiirkeeda Arrimaha Dibada oo si hagar la’aan ah habeen iyo maalin ugu soo jeedey sidii xal loo gaari lahaa, shirkaana maantana waaa mid lagu turxaan bixinayo wixii ka dhimanaa shirkii Addis-Ababa, waxaan loo baahan yahay geesinimo dheeraad ah inaan la nimaano, si aan u aadno Kismaayo inagoo midaysan, shirkana waa inaan dib ugu celino guryaheena iyo geedka hoostiisa, hadii aanaan isu muujin tanaasulaadna ma gaarisiin karno horumar dadkeena.
Ugu danbayntii Cabdi Shire Warsame oo ku hadlayey magaca ergooyinka Jubooyinka qaybtooda ku sugnayd muqdisho ayaa sheegay in heshiiskii Addis Ababa ay wada saxiixeen dowladda Soomaaliya iyo Hogaamiyaha Maamulka Juba Axmed Madoobe, heshiiskaasna ay garab koodu soo dhaweynayaan loona baahan yahay in loo midoobo taaba galinta Maamul dhamaystiran oo ay yeeshaan dadka Jubooyinku. “Xasuustaa xal magaaro, waa murti Soomaaliyeed oo inagu boorinaysa in aan dhanka wanaagsan wax ka eegno oo aan horay uga sii dhaqaaqno halka aan joogno” ayuu yiri Cabdi Shire.
Dhinaca kale, shirar lagaga soo horjeedo shirkan Maanta furmay ayaa ka dhacay Magaalooyinka Baydhabo iyo meelo kale oo ka mid ah goboladda Somaliya,waxaana shirarkaasi qabsanaya beelo ku doodaya inaan lagu soo casuumin shirka iyo kuwo siyaasiyan uga soo horjeeda qorshaha dhismaha Maamul u samaynta iyo dib u heshiisiinta Goboladda Jubbooyinka.
Shirarkaasi oo beryahan dambeba guuxooda la dareemayay, ayaa yimi xili ay dawladda somaliya ku mashquulsantahay hir-gelinta shirkan oo ay goob-joog ka yihiin inta badan hor-joogeyaashii Jubaland.
Madaxweynaha Somaliya xasan sheikh Maxamuud ayaa Khamiistii todobaadkii hore gaadhay Magaalada Kismaayo oo shirkani si toos ah u khuseeyo, isla markaana natiijo kasta oo ka soo baxda lagaga dhaqmi doono.
Shirkan ayaa furitaankiisu shalay ku beegnaa balse dib ugu dhacay arrimo farsamo, waxaana la filayaa inay ka soo baxdo natiijo wanaagsan oo anfacda Mustaqbalka Mujtamaca Goboladda Jubboyinka.
Gobanimonews
Muqdisho Office
Email: editor@gobanimonews.com