Jockas(GNA)-Ciyaar aad u xiiso badan ayaa galabta dhex martay Xulalka Somaliya iyo Burundi, taasoo ka mid ah tartanka Ciyaaraha Bariga iyo badhtamaha Afrika.
Ciyaartan oo ka dhacday Garoonka Kubadda cagta ee Jackos, ayaa xulka qaranka Somaliya lagaga adkaaday 2-0, taasoo ay guushu ku raacday xulka Burundi.
Ciyaaryahanka Somaliya ayaa soo bandhigay ciyaar aad u xiiso badan oo soo jiidatay Taageerayaal Somali ah oo meelo fog-fog isaka kala yimi, kuwaasoo la xamaasadeysnaa aragtida xul ku ciyaaraya magaca somaliya oo ka dheelaya Garoomada caalamiga ah.
Xulka Burundi ayaa Haafkii hore ee Ciyaarta Gool ka dhaliyay shabaqa Xulka Somaliya, iyadoo haafkii dambe Macalinka xulka qaranka somaliya hogaamiyaa wax badan ka bedelay qaabkii ciyaarta, lana soo galeen ciyaaryahanadu dar dar cusub.
Hase ahaatee waxa isku soo noqodkii haafkii dambe ee ciyaarta Garoonka ka da’ay roob weyn oo caqabad ku noqday quruxda ciyaarta iyo dedaalkii ay la soo laabteen Ciyaaryahanada Somalia.
Xubno ka mid ah hogaanka Sare ee xulka Somaliya iyo Safiirka Somaliya ee Kenya oo dhamaadkii ciyaarta ka hadlay, ayaa guul ku tilmaamay dedaalka ay la yimaadeen ciyaaryahanada metelayay dalka somaliya .
Waxa ay sheegeen in natiijada ciyaartu ku dhamaatay wax badan kaga duwantahay tii sanadkii hore Somaliya lagaga reebay tartankan.
Somaliya ayaa sanadkii hore waxa lagaga badiyay isreeb-reebkii tartankan 7-0, taasoo haatan ka dhigaysa inay sidii hore ka soo wanaagsanaanayso xirfada ciyaareed ee Xulka Qaranku.
Halkan ka daawo Ciyaarta iyo hadalada Masuuliyiinta ka hadlay:-