(GNA) Cusbitaalka Dr. Jose Fabella Memorial oo ku yaal magaalada Manila ee caasimadda u ah dalka Philippine, ayaa waadhkiisu yahay ka ugu mashquulka iyo cidhiidhiga badan adduunka, iyagoo sariirtiiba shan dumar ah ku seexdaan, halka maalin kasta ay ku dhashaan 100 carruur ah.
Cusbitaalka meelaha ugu daran waa waadhka umulaha oo ah mid aad u dad badan, haweenka bukaanka ahna aanay wax u qarsoonayn, naftooduna diiqad ku jiraan.
Mrs. Rosalyn waxay ka mid tahay hooyooyinka cusbitaalka lagaga umulinayey, laakiin waxay aad u dhibsatay habka waadhka ee aadka u cidhiidhiga ah, dadkuna aad ugu badan yihiin, waayo waxa in laga umuliyo sugayey 300 dumar ah.
Carruurta ku dhasha cusbitaalkan laftooda waxa xool amma sariir la wada saaraa shan amma wax ka badan, taasoo keentay in ay xataa hawada iska xidhaan, caafimaadkooduna halis galo.
Cusbitaalkani waxa uu u dhaw yahay goob la yidhaa Tondo oo ahaan jirtay meel qashinka lagu ururiyo, balse waqtigan hoy u ah nus milyan qof oo u badan sabool.
“Xataa haddii aanad shaqo haysan, waa inaad biilka bixisaa. Waxaan qoyskayga darii ku helay laba shaqo oo aan qabto. Wax kastoo aan lacag ku helayo qoyskayga waan u samaynayaa, xataa haddii maalmaha fasaxa ee Axadda oo kale la shaqaynayo.” Sidaa waxa yidhi Eduardo oo ah sayga Rosalyn oo ka hadlayey nolosha adag ay ku nool yihiin isaga iyo qoyskiisu.
Mrs. Anna Prebus oo ah madaxa umulisooyinka cusbitaalkan, ayaa sheegtay in aanay iloobay inta ay ka umulisay, “Aad baan uga xumahay. Ma xasuusan karo inta ilmo ee aan hooyadii ka umuliyey, waxa laga yaabaa in ay 200,000 (laba boqol kun) yihiin laga soo bilaabo ilaa 1086 amma ugu yaraan 28 sanno oo aan shaqaynaaey,” ayey tidhi
Diyaariye:C/qaadir Askar
Gobanimonews.com