Johns berg (GNA) Jabhadda M23 oo muddo sanado ah dagaal kula jirtay dawladda Kongo ayaa ku dhawaaqday in ay joojiyeen dagaalkii ay kula jireen dawladaasi, waxaana la sheegay in hoggaamiyaha jabhadaasi ugu baaqay madaxda militeriga ee ururkiisa inay hubka dhigaan.
Hoggaamiyaha kooxdaasi fallaagada ah ee M23 Bertrand Bisimwa ayaa ku dhawaaqay inay soo afjarayaan fallaagonnimadii.
Jamhuuriyadda Dimuqraadiga ah ee Koongo ayaa iyadu dhinaceeda ku dhawaaqday inay ka guulaysatay kooxda fallaagada M23. dawladda waxay sheegtay inay qabsatay goobihii ugu danbeeyay ee fallaagadu haysteen ee bariga dalkaasi.
Af-hayeen u hadlay dawladda Kongo oo magaciisa la yidhaahdo Lambert Mende, ayaa sheegay in ciidankii fallagada M23 ay is-dhiibeen, isla markaana ay u tallaabeen dhinaca xadka dalka Ugaandha.
Ururka M23 ayaa iyagu dhinacooda beeniyay arrintaasi, waxaanay sheegeen in aan laga adkaan, bal se ay go'aansadeen in aanay sii wadin dagaalka ay kaga soo hor jeedeen dawladda Kongo.
Dhinaca kale madaxweynayaal ka socda wadamadda ku bahoobay ururka harooyinka waawayn ee gobolka ayaa ku shiraya dalka Koonfur Afrika, waxaanay ka hadlayaan xal u helidda dhibaatada muddada ka taagan Kongo.
Waxaanay madaxdaasi ugu baaqeen ururka M23 in ay joojiyaan dagaalladda ay ka wadaan bariga dalkaas, waxaanay sheegeen madaxdaasi in muddo shan maalmood guddahood ah heshiis xabad joojin ah la saxeexan doono jabhadda M23.