GNA-Antonio Conte ayaa ugu baaqay taageerayaasha Juventus Stadium inay wacdarro dhigaan kulanka Real Madrid madaama ay ku hogaamin karaan kooxda guusha.
Bianconeri ayaa seddexdii kulan ee ugu danbeysay guul gaadhay iyada oo weliba shabaga ilaashatay oo ay ku jirto kulankii ay 1-0 kaga badiyeen Parma sabtidii.
Waxa ay haatan u jiheysanayaan kulanka habeenka salaasada, marka kooxda Carlo Ancelotti ee Real Madrid ay soo booqato Turin kulan ka tirsan Champions League.
“Madrid waxa ay u darban tahay inay ku guuleysato koobkeedii 10aad ee Champions League, laakiin ma aha inaan ka baqano.” ayuu Conte u sheegay JTV.
“Waxaan durbaba tusnay Madrid waxa aan sameyn karno. Waxaan rajeynayaa in Juventus Stadium uu noqon doono mid xamaasad la karkaraya, si ay taageerayaasha inoogu riixaan guul.”
Juve ayaa 2-1 looga soo badiyay kulankii Bernabeu, laakiin kaliya waa markii casaan muran uu ku jiro laga siiyay Giorgio Chiellini qeybtii labaad.