Jiifto ka hadlaysa Qabyaalada
27-07-2011
Ragganimada Somaalidu Saddexbay u qaybisay waxayna tidhi:
Raggu waa 3
1. Keligii nin
2. Ragg Ku nin
3. Qabiil ku nin
Waa maanso muujinaysa daciifnimada qabyaalada iyo gocorka xun ee ku gabanaya, waa maanso muujinaysa dedaalku inuu yahay horumarka nolosha, waa maanso muujinaysa umaddani waxay hantida u lahayd iyo sida ay maanta u halaabeen ee aan looba dareen sanayn , waa maanso ku baaqaysa in fadhiga laga kaco oo wax la wada qabsado dadkuna is kaashadaan oo il keliya wax lagu wada arko, waa maanso dhalinyarada ku boorinaysa inay dunida ku baraarugaan oo facood la tar-tamaan, waa maanso yasaysa oo buquujinaysa ninka ku gabada qabyaalada waxayna dadka tusaysaa qofka liita ee bilaa aqoonta ahi inuu yahay ka huwan ee xanbaarsan qabyaalada, waxana aan ku bilaabay sidan.
Ogow bisinkiyo quraanka
Aqoontiyo baahinteeda
Inaan beri hore bilaabay
Anoo beybiyoo caruura
Ga,diyo baaleyda maanso
Barteediyo furaha taabtay
Abwaanada baal ku yaala
Suugantooduna bislaatay
Booskoodii inaan la joogo
Berina u hadhaayo meesha
Ba,diyo baydkaa afmeeray
Wixii hadhay aan bal dheehdo
abyaaladu waa belaayo
Belaayona looma baahna
Badheedhe nimaan lahayn
Baqiyo fulaybaa ku dhuunta
Ka shiisu nimay baqayso
Ayaa bidoo ciirsi mooda
Dadkaygoow samaha beero
Dadkaygoow xumaha baaji
Dhulkeeniyo nabada baano
Afkeeniyo baaxadiisa
Hidiyo dhaqankeena buuxa
Ka baaji inuu halaabo
Ba,diyo baydkaa afmeeray
Wixii hadhay aan bal dheehdo
Baleeg arimaha ku seegay
Talooyinka baalka weecday
Hadaanad taab ka buuxsan
Ogow beri waad baslayne
Taariikhda abaaday raadi
Wixii beri hore caraabay
Ku soo qoro buugag waara
Bar-baareey dhaqanka suuban
Ka daaya badheedhka maanta
Ba,diyo baydkaa afmeeray
Wixii hadhay aan bal dheehdo
Bar-baareey maagid maaha,
Dagaal iyo buusna maaha,
Banaan tooc-toocsi maaha,
Dadkoo runta loogu baaqo
Ba,diyo baydkaa afmeeray
Wixii hadhay aan bal dheehdo
Baftiyo saddex qaydi meeye
Dhacliyo boqorkeeni aaway
Bal,dhiishiyo haanti soo day
Hadhuubkii baxnaa la waaye
Bacbaa booskii ka qaaday
Beribaa lala roorayaaye
Ba, iyo hoog yaala weeye
Ayaan daro baahday taa dheh,
Ba,diyo baydkaa afmeeray
Wixii hadhay aan bal dheehdo
Bar-baareey inaad dedaasho
Banaan bax hubaysan qaado
Dalkeena wixii bilaaya
Danteena wixii bogsiiya
Afkiyo dhaqankeena baahsan
Handheer ku bariidinaaya
Inaan wada baadi doono
Bulshooy waa argtideena
Ba,diyo baydkaa afmeeray
Wixii hadhay aan bal dheehdo
Iskaashigu waa badhaadhe
Nolosha lagu baadi goobo
Barwaaqiyo horumarkeena
Bulshadu dhidig iyo laboodna
Ku buuxiso baylahdeeda
Aduunka ragaa banaystay
Badiyo berigaba ku foofay
Bishiyo meerahaba gaadhay
Tacliin bay weheshadeene
Halkay joogaanba beegso
Bareejo ku hay ayaamo
Dabeed bar-barkooda dhaafba
Ba, diyo baydkaa afmeeray
Wixii hadhay aan bal dheehdo
Bar-baareey badi xasuusta
Halkaynu bar joognay waayo
Aduun bar ku gaadhimaayo
Baxnaanee kaydka duugan
Emailkan iigu soo dir wixii talo iyo tusaale ah
Waad mahadsantihiin
Dhammaad...