Gaadhi uu lahaa nin ka tirsan shaqaalaha Dekeda oo waxyaabaha qarxa loogu
xidhay ayaa saaka ku qarxay degmada Xamar weyne,
iyadoo qaraxa aan wax qasaare ah uusan geysan.
Qaraxan ayaa la sheegay in gebi ahaanba uu bur buriyay gaadhiga, waxaana
uu ahaa mid iskiis u qarxay, ka hor inta aan gaadhiga la korin.
Wararka ayaa sheegaya in ninka lahaa gaadhiga uu ku jiray gurigiisa oo
aan ka fogeyn halka gaadhiga uu dhigtay, waxaana goobtaas ay tahay goob
barxad ah oo baabuurta la dhigto.
Gudoomiyaha degmada Xamar weyne C/qaadir Maxamed C/qaadir ayaa sheegay
in qaraxa lagu xidhay gaadhiga, balse aan wax qasaare ah geysan.
“Gaadhi uu lahaa shaqaale ka tirsan Dekeda oo lagu magacaabo Cabdi Cali
ayaa qaraxa loogu xidhay, wuxuu qaraxa ka dhacay nawaaxiga MCH Xamar
weyne, wax qasaare ah ma geysan”ayuu yidhi Gudoomiyaha degmada Xamar weyne.
Qaraxyada lagu xidho gaadhiga ay leeyihiin mas’uuliyiinta iyo shaqsiyaadka
kale ayaa ku soo badanayay magaalada Muqdisho, waxaana ugu dambeeyay
qarax todobaadkii hore uu ku dhintay Mas’uul ka tirsanaa Wasaarada
Gaadiidka.
Al-Shabaab ayaa dar dar gelisay weerarada tan iyo markii ay ku
dhawaaqday inay kordhineyso weerarada inta lagu guda jiro bisha Ramadaan.