Arsenal Oo 3-0 Ay Ku Horeysay Laga Xoogay Bareejo Dirqi Ahna Ku Baxsatay.

Kooxda Arsenal ayaa dirqi kaga baxsatay in 3 gool oo ay ku horeysay ilaa daqiiqadii 60 aad ee ciyaartana ku hogaaminaysay 4 gool loogu bedelo ciyaar lagala daba yimid oo ay dirqi barbaro ah kaga baxsatay naadiga reer Belgium ee Anderlecht oo marti ugu ahayd garoonka Emirates ee magaalada London.



Rigoodhe uu ciyaarta ku furay Mike Arteta , gool labaad oo uu raaciyey xidiga ay dhawaan kala soo wareegtay Barcelona ee Alexis Sanchez ayay waliba ugu dareen gool uu Alex Oxlade-Chamberlain qaybtii dambe ee ciyaarta kaga dhigay 3-0 .

 

Laakiin sidii lagu yaqaanay kooxda Gunners iyo tababaraha qaybta dambe jaba ee Wenger , naadiga Anderlecht ayaa kala daba yimid oo saddexdii goolba ka soo ceshaday Arsenal , kuwaas oo ciyaartu ugu dhamaatay iyagoo raadinaya goolkii Afraad ee guusha.

 

Xidiga Vanden Borre ayaa laba gool oo daran doori ah is raaciyey , waxaana u saddaxeeyey ciyaaryahanka bedelka ciyaarta ku soo gallay ee Aleksandr Mitrovic ciyaariina waxay noqotay 3-3 barbaro ah.

 

Taageerayaasha Arsenal ayaa bilaabay inay dib ugu oriyaan kooxdooda ilaa siidhigii ugu dambeeyey uu ku dhuftay garsoorihii ciyaartu.

 

Kooxda Germalka ah ee Borussia Dortmund oo 4 – 1 ku tuntay Galatasaray ayaa 12 dhibcood hogaanka ugu haysa Group D , waxaana ku xiga Arsenal oo 7 dhibcood leh , Anderlecht oo saddexaad fadhidaana waxay leedahay 2 dhibcood . kooxda Turkiga ahina dhibic kaliya.