New York (GNA)Kumanaan qof ayaa isugu soo baxay magaalada New York ee Maraykanka iyo Magaalooyin kale, iyagoo dalbanaya in Caddaalad la mariyo Askari Booliska ka tirsan oo dilay Wiil dhalinyaro ah oo aan hubaysnayn.
dadkan ayaa cadho ka muujiyay Go’aan Xeer beegti todobaadkii hore ka soo saartay dilka Wiilka dhalinyarada ah oo ahaa inaan la maxakamadayn Askariga Caddaanka ah ee dilay wiilka yar oo Madow ah. Dadkani dibadbaxa dhigaya ayaa isugu uruuray meel u dhow xarunta booliska waxa ayna dalbanayaan caddaalad.
Dadka dibadbaxaya waxay sidoo kale wataan Naxash macmal ah oo ay tusaale uga dhigayaan geerida ninka la dilay. Booliska ayaa hareera jooga mudaharaadayaasham,iyadoo dushana ay kala socdaan Diyaaradaha qumaatiga u kaca.
Maayor-ka magaalada New York Bill de Blasio ayaa shir jaraa'id oo uu qabtay waxa uu ku sheegay in loo baahan yahay in wax laga badalo xidhiidhka booliska iyo dadweynaha u dhexeeya. Sidoo kalena loo baahan yahay in nolosha dadka madowga ah loo qiimeeyo sida tan dadka cadaanka ah.
Maalintii Arbacada ahayd booliska magaalada New York waxay xabsiga dhigeen dad gaadhaya 83 qof oo mudaaharaadayay ka dib markii lagu eedeeyay falal rabshado la xidhiidha.
Gobanimonews.com
Hargaysa/somaliland
mustafe herer
