Hargeysa(GNA).Afhayeenka Madaxtooyada Somaliland Axmed Saleebaan Dhuxul, ayaa Aflagaado qaawan kula kacay Siyaasiyiin Lafdhabar hore ugu ahaan jiray Xisbiga Kulmiye, Xukumaddana Xilal ka soo qabtay. Waxa uu sidoo kale Aflagaadeeyay Xisbiga Waddani oo ku tilmaamay mid fashilmay qabyaaladna wax ku raadinaya.
Mr Dhuxul oo u Waramay Wargeyska Somalilandtoday oo Xukumadda taabacsan ayaa ugu horayn kahadlay masuuliyiinta Xukumadda ka tirsanaan jiray ee Waddani ku biiray “Kuwaasi, waa kuwii Naaneysaha iyo baraha Madow shacabka dhexdiisa ku lahaa, waa kuwii ku fashilmay ee wadi kari waayay xilalkii uu Madaxwaynuhu u dhiibay, kuwaas ayaa maantana doonaya inay xisbi fashilmay u soo hagoogtaan oo ay dadka iyo dalka la hor-yimaaddaan, aad baanu uga xunnahay. Shacabka reer Somaliland way ogsoon yihiin in kuwaasi ay yihiin wax ma tarayaal aan barnaamij siyaasadeed u soo bandhigi Karin shacabka”
Wuxuu Dhuxul ku Eedeeyay Xisbiga Waddani Qabyaalad “Qabyaaladdaa aan qiilka loo hayn ee ay wadhfinayaan (Waxba tari mayso), dalkani dimuqraadiyad ayuu gaadhay, dalkani xisbiyo ayuu ku dhisan, qofkii doonaya inuu tartamo si wanaagsan barnaamijkiisa ha ugu sheegto, laakiin xisbiga WADDANI qabiil iyo caytan ku gaadhi maayo meel”
Mr Dhuxul ayaa sidoo kale Farriin u muuqata inuu kaga cabanayo Dhaliilaha loo jeediyo Xukumadda u diray Gudoomiye Cirro “Waxaanu leenahay Guddoomiyaha WADDANI ee maalin walba la leeyahay kaalay na dhageyso aanu caytannee, waxaad tahay Guddoomiyihii Baarlamaanka , waxaad tahay Guddoomiye xisbi doonaya inuu dalkan mustaqbalkiisa hiigsado, inkastoo hiigsigaa iyo meesha loo socdo midna aanad u qalmin, haddana waxaad maalin walba ku raaxeysanaysaa cayda iyo beenta lagaa ag leeyahay, waxaanu leenahay Guddoomiyaha waxaad doonayso iyo halka aad socotaa aad bay u kala fog yihiin, waayo waa xisbi isku bahaystay qabyaalad, waa xisbi inta uu xaafadaha soo dhex maro doonaya inuu ummadan qabyaalad u sheegto. Somaliland way dhaaftay qabyaalad ee haddaad wax isla haysaan diyaar garooba oo cayda iska daaya oo Madaxwaynaha iyo Madaxtooyada Qaranka ka xishooda, laakiin qof fashilmay ma xishooda”
Bulshada Somaliland ayaa tan iyo Markii Xukumadda Kulmiye xilka qabatay dareemaysay dib u curashada qabyaalada, iyadoo inta badan loo nisbeeyo in Xisbiga Kulmiye lagu doortay Caadifad qabiil islamarkaana lagu eedeeyo inay ku dhaqmeen Qaraabo Kiil iyo Eex.
Masuuliyiinta hore uga tirsanaan jiray Xukumadda Madaxweyne Siilaanyo ee ka tirsanaa Xisbiga Kulmiye ayaa ahaa kuwo Miisaan culus ku lahaa Ololihii doorashada iyo soo hoynta cod badan oo Kulmiye ku helay Kursi, balse haatan oo ka aag badasheen ayaa Xisbiga Kulmiye isku bahaystay Caydooda.
Mustafe Axmed Herer
Gobanimonews.com
Hargaysa/somaliland
Xogasho S/land today
