Qoryoolay(GNA)-Dagaal ayaa ku dhex maray deegaamo hoos taga Degmada qoryoolay Ciidamada AMISOM iyo milateriga Somalia oo isgarabsanaya iyo Maleeshiyaadka Alshabaab.
Dagaallo kale oo wakhti kala dambeeyay ayaa iyaguna dhacay degmada ceel-buur iyo deegaamo kale xalay ilaa maanta.
Warbaahinta ku hadasha afka Ururka Alshabab ayaa sheegay inay Maleeshiyadka xarakadu duqeymo ka geysteen xalay saldhigyo ku yaala Degmada Ceel-buur oo ay leeyihiin ciidanka Itoobiya.
Dhinaca kale, sida laga soo xigtay saraakiisha Ciidanka Dawladda, waxay maanta xooggaga dawladdu weerar ku qaadeen xarumo ay isku uruursanayeen Kooxda Al-shabaab.
Sida laga soo xigtay sarkaal sare oo u hadlay ciidanka dawladda, weerarka ayaa ka dambeeyay xogo ciidanku helay, kaddibna ay la wareegeen Ciidanku goobihii shabaabku isku uruursanayay.
“Waxaan helnay xog ku saabsan goob ay isku urursanayaan Al-shabaab oo ku taala duleedka Qoryooley ka dibna ciidamada XDS oo kaashanaya AMISOM ayaa weeraray” sidaas waxaa yiri sarkaal magaciisa ku sheegay Maxamuud Cabdi oo ka tirsan ciidanka dowlada.
Sarkaalka u hadlay Ciidanka dawladda ayaan sheegin wax khasaare ah oo dhankooda soo gaarey wuxuuse intaasi ku daray inay Maleeshiyaadka Alshabaab Maydad halkaa ka qaateen.
Ma jiro wax war ah oo dhinaca Saraakiisha Shabaab ka soo baxay, wallow warbaahinta taageeraa warar kala duwan oo sheegaya in khasaare loo geystay ciidanka tebinayaan.
Gobanimonews
Muqdisho Office
Email: editor@gobanimonews.com