Xasan Sheikh Maxamuud ma heli doonaa Codka 139 Xildhibaan?
Muqdisho(GNA)-Mooshinka ka dhanka ah Xukuumadda Reysal-wasaare Cabdi Faarax Shirdoon Garaad, ayaa maanta la horkeenay Golaha Baarlamanka Somaliya.
Mooshinkan oo todobaadkii hore Golaha loo soo gudbiyay ayaa shirguddoonka Goluhu sabtidii hore Xildhibaanada ku war geliyay inay sabtida Maanta u soo diyaar garoobaan doodiisa.
In ka badan 224 Xildhibaan ayaa soo xaadiray fadhigan Maanta, kuwaasoo isu diwaan-geliyay inay ka qayb qaataan Doodda Mooshinka.
Xildhibaanada Fadhiga ka soo qayb galay ayaa kala taageersan Madaxweynaha iyo raysal-wasaaraha oo Khilaaf ka dhex qarxay bishii hore uu sababay in codka Baarlamanka lagu kala baxo.
Doodda Mooshinka ayaa loo balamay Maalinta Berri ah oo si rasmiya loo guddo geli doono, taasoo muhiim weyn u leh labada dhinac.
Madaxweynaha ayaa laga rabaa inuu keensado ama uu helo sii ugu guulaysto Mooshinka 139 Xildhibaan codkooda, halka Reysal-wasaaruhu ku badbaadayo hadii uu keensado 69 Cod.
Raysal wasaare Saacid ayaa la sheegay inuu haysto Xildhibaano tiradooda lagu qiyaasay boqol iyo dheeraad, balse madaxweynaha ayaa la hadal hayaa inuu mar walba tirada xildhibaanada taageersan ka badan yahay Reysal-wasaare Saacid.
Madaxweyne Xasan Sheikh Maxamuud ayay ka go’antahay inuu bedelo reysal-wasaare Saacid iyo Xukuumaddiisa, balse hadii uu taasi ku guul-daraysto waxa uu waajihi doona cawaaqib siyaasadeed oo aan wanaagsanayn, kaasoo saameyn ku yeelan doona geedi socodka siyaasadiisa dhow.