Wayne Rooney ayaa shidaal ku sii shubay dabka shidan ka hor kulanka
axada ee Manchester derby isagoo sheegtay in kulankaas uusan aheyn
kulankooda ugu weyn ee xilli ciyaareedka.
Manchester United ayaa Etihad Stadium ku wajaheysa kooxda Manuel
Pellegrini ee Manchester City kulan si aad ah loo sugayo, laakiin Rooney
ayaa aaminsan in kulamada ay la ciyaaraan Liverpool inay micno weyn ugu
fadhiso kooxda Old Trafford ka dhisan.
“Dhamaantood waa kulamo waa weyn. Sida iska cad United iyo Liverpool
ayaa aheyd kulanka ugu weyn muddo sanooyin ah” ayuu Rooney u sheegay
Daily Mirror markii la weydiiyay hadii xafiiltanka United iyo City uu
haatan yahay kan ugu weyn kubada cagta Ingariiska.
“City dhawaanahan guulo ayay gaarayeen, laakiin waxaan dhihi lahaa
United iyo Liverpool ayaa weli ah kulanka ugu weyn.”
Si kastaba, Rooney ayaan qabin in kulanka ay la ciyaarayaan deriskooda
inuu yahay mid qeexaya halka xilli ciyaareedka uu u jiheysanayo.
“Ciyaartoyda Ingariiska ayaa si aad ah uga warqaba waxa ay la micno
tahay kulankaan ka dib afartii ama shantii sanno ee u danbeysay” ayuu
yiri 27 jirkaan.
“Waa kulan weyn waxaana rajeyneynaa inaan badino. Goolal ayaan ka
dhaliyay City, indhaha ayaana ku hayaa kulankaan.
“Waa kulan weyn oo u dhaxeeya labo kooxood oo horyaalka ku tartamaya. Ma
ahan kulan qeexaya halka xilli ciyaareedka uu u jiheysanayo, laakiin waa
kulan weyn, waa derby maxali ah.”