Marka(GNA)-Madaxtooyada Somaliya ayaa meesha ka saartay jiritaanka Khasaare weftiga madaxweynaha somaliya ee sh.hoose ku sugan ka soo gaadhay weerar Dhul-jiifnimo ah oo Alshabaab ku qaaday.
Kooxda Alshabaab ayaa sheegatay Weerarkaasi, waxaanay ku doodeen inay Khasaare balaadhan gaadhsiiyeen Kolanyo ka mid ah Ciidanka Ilaalada Madaxweynaha.
Hase ahaatee Warsaxaafadeed uu soo saaray Afhayeenka Madaxweynaha somaliya En. Cabdiraxmaan Yiriisow, ayaa lagu sheegay in madaxweynaha iyo weftigiisu nabad qab ku gaadheen Magaalada Marka oo ay kaga qayb-gelayaan dib u heshiisiin Beelo halkaasi ku dagaalamay.
Warsaxaafadeedka ayaa u dhignaa sidan:-“Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ay wehliyaan, Wasiiradda, Cadaaladda , Gaashaandhigga, Arrimaha Gudaha iyo Amniga Qaranka Taliyayaasha Ciidamadda Xooga iyo Nabad Sugidda ayaa maanta gaaray magaaladda Marka ee Xarunta Gobolka Sh/Hoose.
Madaxweynaha oo saaka safar dhulka kaga baxay magaaladda Muqdisho ayaa ku hakadey degaanka No 50 halkaasi uu kula hadlay boqolaal qof oo ka tirsan dadka degaanka islamar-kaana ka dhageystay tallooyinka ay u soo jeediyeen duqeyda degaanka ka dibna halkaasi safarkii dhulka ahaa ka sii watay.
Waxaa magaaladda Marka ku soo dhoweeyey Madaxweynaha Jamhuuriyadda Federaalka Soomaaliya Xasan Sheekh , Maamulka Gobolka Sh/Hoose iyo kan Degmadda Marka , Saraakiisha ciidamadda iyo Shacabka magaaladda .
Ujeedda Safarka Madaxweynahu ee magaaladda Marka iyo degaanadda kale ayaa ah baahinta nidaamka Dowladnimo ee goboladda dalka , dib-uheshisiinta, la tasshiyada bulshadda Shirweynahayaasha Qaran ee ka socda Muqdisho, Shirka 16 September Burgles iyo aragtida fog ee Dowladda ee ah in doorashooyin dhacaan 2016.
“Ma jirto haba-yaraatee wax carqalad ah ee uu la kulmay Madaxweynaha iyo wafdiga , waan la soconaa Kooxaha nabad diidka wax-yaalaha ay baahiyeen laakin xaqiiqdu waxey tahay in si nabad ah Madaxweynahu uu ku gaaray Marka” Ayuu yidhi Afhayeenka Madaxweynaha Mudane Cabdiraxmaan Cumar Yariisoow
War ka soo baxay kooxda Alshabaab ayaa sheegay in Dagaalyahanada Ururkaasi fuliyeen weerar Khasaare ka dhashay oo ay ku qaadeen Kolanyo ka mid ah weftiga madaxweynaha.
Gobanimonews
Muqdisho Office
Email: editor@gobanimonews.com