Ankara-Isbahaysiga Nato ayaa isu diyaariyay guluf ka dhan ah Dawladda Islamiga ah ee Daacish, kaasoo ku wajahan Magaalooyinka ku yaalla xuduudka u dhexeeya Turkiga iyo Syria, halkaasoo ay shalay qabsadeen Dagaalyahanada Daacish.Dagaalyahanada Daacish, ayaa gudaha dalka Turkiga u soo riixay Maleeshiyaadka Kurdishka ah ee Maamula Gobolka Xadka ku yaala, waxaanay shalay qabsadeen Magaalada Kobane iyo buuralayda Istaraatiijiga ah ee Mistenur.
Calanka Dagaalyahanada daacish ayaa ka babanayay Magaaladan Isniintii shalay, waxaanay taasi cabsi badan ku abuurtay Dawladda Turkiga.
Wasiirka Difaaca ee Kobane Ismet Yildiz ayaa sheegay inay NATO qorsheynayso talaabo ay kaga jawaabayso codsiga Turkiga ee ku aadan Dagaalka ay Daacish ku soo qaadeen soohdinta dalkooda.
Baarlamanka Turkiga ayaa dhawaan ansixiyay sharci cusub oo ay Ankara ku merti gelinayso Gaashaan-buurta Maraykanku hogaaminayo ee la dagaalanka Dawladda ISIL ee Ciraaq iyo Syria.
Madaxweynaha Turkiga oo todobaadkii hore si cad u sheegay in ISIS khatar ku tahay ammaanka mandaqada, loona baahanyahay in talaabo adag laga qaado.
Recap Tayyip Erdogan oo maanta hadlay ayaa sheegay inay Dawladdiisu soo dhaweynayso Ciidamada ka socda Gaashaam-buurta NATO ee kala qayb qaadanaya difaaca la dagaalanka ISIL.
“Waanu furnay garoonka looga duulayo ISIL”ayuu yidhi Erdogan.
Dagaalyahanada Kurdishka ayaa maalmihii la soo dhaafay dagaal adag la galay Jihaad doonka Daacish, waxaana la sheegay inay ugu yaraan 20 Dagaalyahano ISIS looga dilay iska hor-imaadyo ka dhacay dhowr magaalo xadka ku yaalla.