Maroodigu Takarta ku taagan ma arkeen ta saaxiibkii ku taagan ayuu arkaa: Waddani oo laga diiday Xisbiyahan Fadal iyo C/qaadir Iimaan oo Saleebaan Guurti keenay?Warbixin
Hargeysa(GNA)-Madaxweynaha Somaliland ayaa caawa qoraal uu ka soo saaray madaxtooyada, waxa uu ku shaaciyay Lix ka mid ah Guddida Doorashooyinka ee cusub oo ay soo kala xuleen madaxweynaha, Golaha Guurtida iyo Xisbiyada Mucaaridka ah.Madaxweynaha ayaa sidoo kale Xisbiga Mucaaridka ah ee WADDANI ku celiyay xubin lagu eeddeeyay xisbinimo oo mar hore xisbiga intuu ku soo celiyay hadana ay dib u magacowdeen.
Magacaabista Komishankan cusub ee madaxweynuhu ku dhawaaqay iyo xubinta uu ka reebay, ayaa durba dood iyo falan qeyn ka abuurtay majaalista Siyaasadda lagu gorfeeyo, balse waxa caadatay markii Magacyada la helay in xubnahan Guurtidu soo gudbisay oo laba ah ay yihiin Saraakiil Dawladda u shaqeeya oo la taliyeyaal u ah Wasiirrada Arrimaha Dibada iyo Madaxtooyada.
Ka sekow shaqooyinkaasi dawliga ah ee ay hayaan xubnaha Guurtidu soo gudbisay, waxa xaqiiqo ah inuu ka mid ah labada xubnood ku jiro Golaha Dhexe ee Xisbiga talada haya ee Kulmiye, kana mid ahaa Siyaasiyiintii Xaqsoor ee dhawaan ku biiray, kaasoo sidoo kale la-taliye u ah Wasiirka Madaxtooyada Xirsi Cali Xaaji Xasan.
Cabdiqaadir Iimaan oo ka mid ah labada Xubnood ee Golaha Guurtidu u soo gudbiyeen Madaxweynaha si loogu daro Guddida cusub ee Doorashooyinka, ayaa marka koowaad wuxuu ka tirsanyahay oo uu magaciisu ku soo baxay labadii Liis lagu magacaabay Golaha dhexe ee Kulmiye Bishii May, isagoo hore u ahaa xubnihii Urur siyaasaddeedkii xaqsoor.
Eng. Cabdiqaadir iimaan waxa kale oo sidan kor ku xusnay uu la taliye u yahay Wasiirka Madaxtooyada, sida gobanimonews xogta ku heshay uu kala shaqeeyaa Arrimaha Waddooyinka.
waxaana xusid mudan xataa hadii aanu hada Golaha dhexe ee Kulmiye Sharciyan ugu ansaxmin, isla markaana aan xal waara laga gaadhin labadii liis ee Hogaanka Xisbiga iyo Xukuumaddu kala magacaabeen, inuu Masuulkani xaflad laysku arkay uu Mabd'iisa Kulmiye ku caddeeyay, kana mid ahaa xubno dhabarka ka toogtay Hogaamiyihii Ururkooda Xaqsoor Xasan Ciise Jaamac.
Waxa la sheegay in Cabdiqaadir Iimaan uu u soo gudbiyay Guddoomiyaha Golaha Guurtida, Wasiirka ay wada shaqeeyaan ee Madaxtooyadu, iyadoo isla caawana lagu dhawaaqay Magacyada xubnahan si looga gaashaanto inay Mucaaridku ka hadlaan.
arrintan ayaa loo arkaa mid meesha ka saaraysa dhexdhexaadnimada xubnaha hada lagu dhawaaqay ee Komishanka cusub, sida ay ku dooddayaan dadka arrimaha Doorashooyinka Somaliland faaqidaan. “in Nin ka tirsan Golaha dexe ee Kulmiye Guurtidu ku darto Komishanka waxay meesha ka saaraysaa dhexdhexaadnimadii iyo in la helo Guddi caddaalad ku maamusha doorashooyinka”sidaasi waxa yidhi Siyaasi falanqeeya arrimaha siyaasadda oo GNA la hadlay.
Inay Guurtidu soo gudbiso ashkhaas noocan ah oo aan dhexdhexaadnimo lagu tilmaami Karin, ayaa waxay dadka siyaasadda kulaalaa ku dhaliilayaan Xisbiyada Mucaaridka ah oo la leeyahay waxay gabeen kaalintoodii ku aadanayd inay Xukuumadda iyo Hay’addaha kale ee dastuuriga ah ku ilaaliyaan Sharciyada iyo caddaalad falida. “dhaliishaa waxa iska leh oo aan dusha ka saarayaa Xisbiyada Mucaaridka ah oo runtii Indhaha ka qarsanaya inay Xukuumadda ku ilaaliyaan inay doorashooyinka u maamusho si caddaalad ah iyo inay ku dhaliisho khaladaadka ay gelayso, waayo iminka kalsoonida inta le’eeg ee Guurtidu ku magacowday Ninka xukuumaddu u soo gudbisay , waxa weeye dayac dhinaca Mucaaridka ka yimi”ayuu yidhi Siyaasi kale oo mowduucan ka hadlay.
Inkasta oo goor sii horaysay la sheegay in Madaxweyne Siilaanyo uu soo celi doono xubintan labaad ee Xisbinimadu ku shaambadeysantahay, hadana waxaad moodaa inay taasi meesha ka baxayso maadaama Liiskii lagu dhawaaqay, lana shaaciyay lixda xubnood ee uu todobaada ku ahaa Maxamed Cismaan Fadal oo xisbiga WADDANI ka mari waayay, laguna celiyay.
Dadka dhinaca sharciga ka eegaya Mowduucanina, waxay ku dooddayaan inay ahayd in labada xubnoodba la soo wada celiyo, balse kuwa sheegaya inay dhexdhexaad ka yihiin dhamaan arrimaha Siyaasadda, ayaa wer wer ka muujinaya Kalsoonida lagu qabi karo Komishankan dhinaca ka raran ee ay xubnihii Golaha Guurtida dalku soo xushay madaxtooyada ka shaqeeyaan, kana tirsanyihiin xisbiga talada haya.
Si kastaba ha ahaatee talaabooyinka noocan ah ee ay falistood xukuumaddu horkacayso, ayaa saameyn ku yeelan kara dareenka ay daneeyayaasha Doorashooyinka Somaliland ku eegayaan howlaha farsamo ee socda, taasoo shaki badan abuuraysa, hadaanay madaxtooyadu sixin khalaaadka ay wado ee hadana ay mucaaridka iska hortaagtay.
Magacyada Lixda Xubnood ee Madaxtooyadu ku dhawaaqday.
1- Mudane, Maxamed Jaamac Maxamed.
2-Mudane, Maxamuud Jaamac Wacays.
3-Marwo, Kaltuun Sheekh Xasan Cabdi.
Labada Xubood ee Golaha Guurtida:
4-Mudane, Siciid Cali Muuse
5- Mudane, Cabdi-qaadir Iimaan Warsame.
Xubinta Xisbi UCID:
6-Mudane, Cabdi-fataax Ibraahim Xassan cusub ee doorashooyin