Stokhlom(GNA)-Dawladda Sweden ayaa si rasmi ah u aqoonsatay in dalka Falastiin uu yahay dal madaxbanaan. Talaabadan ayaa timid ka dib markii Ra’iisal Wasaaraha cusub ee dalka Stefan Lofven uu jimcihii ku dhawaaqay in Falastiin ay tahay dal madaxbanaan, dawladiisuna ay ula dhaqmayso sidii waddan xor ah.Golaha Guud ee QM, ayaa bishii November ee sanadkii 2012kii Falastiin u aqoonsaday xubin aan buuxin, hase yeeshee ah kor-jooge golaha ka tirsan.
Aqoonsigan ayaa falastiiniyiinta ka caawin kara inay wadamo kale oo calamka ah, ama dalalka kale ee Reer Yurub taageeraan.
Sweden ayaa ka mid ah Midowga Yurub saameyna ku leh siyaasadda ururka iyo QM, waxaanay khubarada Siyaasadda ee soomaalidu arrintan ku macneeyeen mid ka dhalatay isbedelka siyaasaddeed ee dalka Sweden ka dhacay.
Dalka Sweden ayaa Baarlaman cusub la doortay 14-kii Bishii September, taasoo uu ku guulaystay aqlabiyada baarlamanka Xisbi Mucaarid ah,waxaanay taasi keentay in Reysal-wasaare cusub ay soo magacabaan Mucaaridku, kaddib markii kii hore laga guulaystay Xisbigiisa.
“aqoonsiga Sweden waxay caawinaysaa dadka reer falastiin inay helaan horumar siyaasaddeed, oo ay dalal kale ku aqoonsanayaan, laakiinse maamulkan falastiin hada haysta ee Maxamuud Cabaas waa mid daalay oo musuqmaasuq la degay, wax badana aan laga filayn inuu qabsado” sidaasi waxa VOA u sheegay Prof. Axmed Ismaaciil Samtar oo bare ka ah kulliyadda James Wallace ee Jaamacadda Macalester ee Dalka Maraykanka.
Aqoonsiga cusub ee falastiniyiintu ka heleen Sweden ayaa ku aaday xilli aanay wali maslaxad cago ku taagan laga gaadhin dagaalkii dhiiga badani ku daatay ee u dhexeeyay Israa’iil iyo Kooxaha reer falastiin.
Dagaalkaasi ayaa galay wakhti kooban oo xabad joojin ah, bil ku dhawaad ay labada dhinac birta iska asleen, isla markaana kumanaan falastiiniyiin ah iyo boqol ka badan Yuhuud ah ay dhinteen.
Si kastaba ha ahaatee kor u qaadista qadiyadan Falastiin ayaa ah arrin u dabran dunida carabta, kuwaasoo hadii ay meel uga soo wada jeestaan wakhti yar ay ku qaadanayso inay meel ku tiiriyaan.