Hargeysa(GNA)-Maxkamada Ciidamada Somaliland ayaa xukunno Dil iyo xadhig isugu jira ku riday Saraakiil iyo Askar dableyaal ah oo ku eeddeysan dilka laba sarkaal oo dhawaan lagu qaarajiyay Taliska Guutada 17 aad ee Ciidamada Somaliland.Dilka labada Sarkaal ayaa dhacay Bishii September ee la soo dhaafay goor maqrib ah, kadib markii Askari loo xidhay anshax marin oo ciidanka ka tirsanaa toogasho ku dilay.
Maxkamadda ayaa dil ku xukuntay Askarigii Dilka geystay oo baxsi ku maqan, kuwo kale oo lagu eeddeeyay inay u fududeeyeena waxa lagu rudiday xukuno xadhig dheer ah.
Sidaasina waxa Sabtida maanta ku dhawaaqay Guddoomiyaha Maxkamadda Ciidanka Qaranka Somaliland ee Darajada Koowaad ee Goboladda Galbeedka Gaashaanle Sare Yuusuf Faarax Sharmarke.
Gaashaanle Sharmarke ayaa shaaciyay Liiska Magacyada askarta la xukumay.
- Gacan ku dhiigle Faarax Maxamed Ismaaciil waxay Maxakamaddu ku xukuntay Dil, kaasoo ah Ninkii Dilka geystay.
- Laba Xadhigle Carraale Muuse Cabdi oo lahaa Heeganka Xerada Dilku ka dhacay Toddoba sano oo xadhig milatari ah.
- Dable Cabdi Cawal Maxamed oo ahaa kamaan-boostihii waardiyaha ahaa sideed sano oo xadhig Milatari ah
- Dable Faarax C/laahi Maxamed oo ahaa Askarigii qorigiisa Dilka lagu fuliyey shan iyo toban sano oo xabsi Milatari ah
- Dable Khadar Xasan Ismaaciil waa Askarigii silsilada ka furay gacan ku dhiiglaha oo maxbuus ahaa ka hor intaanu Dilka geysan waxaana lagu xukumay Toban Sano oo Xabsi Milatari ah Hase yeeshee waxa ay Maxkamadda Ciidanku xorriyadiisa u celisay Dable Khadar Axmed cawil kadib markii Danbi lagu caddeyn waayey, halka Gacan ku dhiiglaha oo maqan ay kaga xukuntay Dil.
Ka sekow Gacan-ku dhiiglaha dilka geystay, askarta kale ayaa waxa lagu eeddeynayaa inay fududeeyen dilkan, isla markaana si uun door ugu lahaayeen.
Gobanimonews
Hargeysa Office
Email: editor@gobanimonews.com