Hargeysa(GNA)-Ma cadda inay ku jiraan tiro maxaabiis ah oo arrimo siyaasaddeed loo xidhay labadii sanno ee u dambeeyay, ku dhowaad 300 (Saddex boqol oo maxbuus), oo uu todobaadkan qalinka ku duugay in cafis madaxweyne lagu sii daayo maalmaha ugu dambeeya dabaal-degyada Ciiddal Adxada ee usbuucan badhtankiisa.Saraakiil ka tirsan Ciidanka Asluubta Somaliland ayaa Gobanimonews u xaqiijiyay in Madaxweynuhu Cafis u fidiyay Maxaabiistan oo ku kala xidhan xabsiyada dalka, kaddib markii uu taliskoodu u gudbiyay si madaxweynuhu u ogolaado.
Madaxweynaha ayaa sanad kasta cafis u fidiya tiro maxaabiis ah, laakiinse kuma jiraan kuwa u xidhan dambiyada cul culus ee Dilka, argagixisanimada iyo Budhcad-badeednimadu ka mid tahay, inkasta oo sanadkii 2011 maxaabiis kiisas budhcad-badeednimo u xidhan si badheedh ah dawladdu sii daysay, iyadoo lagu bedeshay Gaadhi laga heystay muwaadin u dhashay Somliland oo laga qafaashay Gobolka Mudug.
Dadka Cafiska Madaxweynaha kaga baxsaday jeelasha xilliyada Munaasibadaha qaran, sida ciiddaha, waxa ka mid ah kuwa u xidhan Dambiyada fudud, sida tuugada aan dacwadi ka furnayn, dhaqan-celinta, kuwa lagu xukumo mukhaadaraadka iyo Kiisaska la midka ah.
Tibaaxo aan wali si rasmiya u caddaan ayaa sheegaya inay Maxaabiista cafiska ku jira ay ka mid yihiin xubno afkaar siyaasaddeed u xidhan oo ay ka mid yihiin aqoonyahan Jaamac Cilmi Jiir, xubno ka mid ah taageerayaashii Muuse Biixi ee la xidhay xilligii Khilaafka oo ku hadhay jeelasha iyo waliba wasiir ku-xigeenkii hore amniga Somaliland oo ay Maxkamadi ku socoto.
Si kastaba ha ahaatee Saraakiisha Warka laga soo xigtay ayaa sheegay inay xoriyada heli doonaan maxaabiistaasi saddex maalmood ee soo socda.
Jeelasha ugu waaweyn ee dadkan laga soo dayn doono waxa ka mid ah Xabsiga Mandheera, Xabsiga Hargeysa, ka Burco iyo ka Gabiley oo dadka ugu badan ee la xukumo lagu xabiso.
Gobanimonews
Hargeysa Office
Email: editor@gobanimonews.com