Booraamo(GNA)-Xiisad ayaa ka soo cusboonaatay Deegaanka Baliga Diiriye Guuleed Sabtidii Maanta , kaddib markii Rag hubaysan ay rasaas ku mireen dad reer guuraa ah hiirtii waaberi ee saaka, meel aan ka fogayn degsinta ay labada deegaan ku muransanyihiin.Deegaanka Baliga Diiriye Guuleed oo dhinaca Waqooyi kaga beegan Magaalada Burco ee xarunta Gobolka Togdheer, waxa muran ku dhex maray Bilihii la soo dhaafay laba beelood oo wada dega, kuwaasoo isku khilaafay in magaaleeyo.
Xiisada ka dhalatay Deegaankan lagu murmay oo ay hore xukuumadda iyo ergo Golaha Guurtida ka socotaa uga soo saareen go’aamo, ayaa cusboonaanshiyaheedu salka ku hayaa diidmo ay hore ugu gacan saydhay mid ka mid ah labada beelood oo saluugtay.
Dabley hubaysan oo lagu tirinayo inay ka soo jeeddaan beesha go’aamada diiday, ayaa habeen hore hiirtii sida la soo sheegay rasaas ku furay dad reer baadiye ah oo halkaas degen, sida ay Wargeyska u soo wariyeen dad xogogaal ah.
Ma jiro wax khasaare ah oo sida la sheegay ka dhashay rasaasta, balse waxa warku intaas ku daray in dhacdadani ay cabsi iyo xiisad hor leh ka abuurtay deegaanka, iyadoo ay saaka ciidamada ammaanku howl-gal ka sameeyeen, inkasta oo aanay gacanta ku soo dhigin dad hubaysan.
Warku wuxuu intaas ku darayaa inay Bilaysku xabsiga u taxaabeen Odayaal ka soo jeeda dhinaca loo tuhunsanyahay in Kooxda weerarka qaaday ay ka soo jeedaan, kuwaasoo laga soo qabtay Deegaanka shaqaaqadu ka taagantahay.
Odayaashan la xidh-xidhay waxa tiradooda lagu sheegay 6 xubnood, laakiinse ma kala cadda inay nabad-doono ku jiraan iyo in kale. Waxaana laga soo xidhay Odayaashan Deegaan la yidhaahdo Booraamo oo u dhow meesha laysku haysto.