Saax-dheer(GNA)-Askari ka tirsan Ciidanka Qaranka Somaliland ee ku sugan Deegaanka Saax-dheer ee Gobolka Sool, ayaa toogasho lagu gelinkii dambe ee Maanta xilli ay cad-ceedu sii dhacaysay, kaddib markii Dablay hubaysani soo weerartay isagoo jooga magaalada dhexdeeda.Dad-goob-joogeyaal ah ayaa Gobanimonews u xaqiijiyay in Askarigan oo keligii ah lagu dilay Meel uu ka dukaamaysanayo, laakiinse lama aqoonsan cidda ay yihiin kooxda dishay.
Dilka ayaa markii dhacay waxa magaalada ka da’ay roob xooggan, kaasoo sababay in lagu kala yaaco magaalada oo ay dadku guryaha ku xaroodaan, isla markaana ciidanka u sahli wayday inay baadhitaan sameeyaan.
Dhinaca kale, Sarkaal ka tirsan Ciidanka Aagaas ee Somaliland ayaa Gobanimonews u xaqiijiyay dhimashada Askarigan oo Gaadmo lagu dilay, waxaanu sheegay inay ku daba joogaan dablaydii fulisay dilka oo markiiba goobta ka baxsaday, isla markaan Roobabka da’ay ay u sahleen inay baxsadaan.
Askariga la dilay ayaa magaciisa la odhan jiray Cabdi Maxamed (Cabdi Liji), sida laga xaqiijiyay Qoyskiisa oo ku nool Magaalada Berbera.
Warar lagu baahiyay warbaahinta taageerta Maamulka la baxay Khaatumo ayaa sheegaya inay Dilkaasi fuliyeen dablay ka tirsan Maleeshiyaadka Khaatumo, balse ma jirto sheegasho cad oo ka soo baxday maamulka sare ee Khaatumo.
Waxa kale oo ay Warbaahinta Deegaanku sheegeen in xaalada Saax-dheer qasantahay tan iyo markii Dilku dhacay, balse saraakiisha Somaliland ee ku sugan Deegaankaasi waxa ay sheegeen in xaaladu degentahay, wax dhibaato ah oo aan dilkaas ahaynina aanu ka dhicin.
“Magaaladu waa caadi, Maydkiina waanu ka soo qaadnay, wax dhibaato ah oo aan intaas ahaynina kama jirto” ayuu yidhi Sarkaal u hadlay Ciidanka oo ka cudur daartay in magaciisa aanu soo xigano.
Ciidamada Somaliland ayaa dhawaan ka qabsaday Deegaanka Saax-dheer Khaatumo.
Gobanimonews
Laascaanood Office
Email: editor@gobanimonews.com