24/12/2013 Salaasa..Borama(GNA) Hawlaha dhismaha jidka isku xidha Dila iyo Boorama oo ay gacanta ku hayaan hayada ASARDA ayaa meel wanaagsan oo gabo gabo ku dhaw maraya, maanta waxa laami la dhigay dhawr km oo jidkaasi ah, taasi oo ku dhawaynaysa jidkaasi dhamaad, waxana ay maanta wadadu Afka soo saartay magaalada Gorayacawl oo ay ku joogtay jidka laamiga ah ee ka taga magaalada Boorama.
Hawshan socota ayaa maanta waxa soo booqday Sh. Maxamed Shiine oo ka mid ah culimadad waawayn ee Soomaaliyeed, waxana markii uu halkaasi tagay wehelinayay, Sheekhul baladka Boorama, odayshaqameedyo, xubnaha hayada ASARDA oo aan kala hadhin iyo suxufiyiin.
Gudoomiyaha Hayada ASARDA Md. Cabdilaahi Xaaji Ciise oo warbixin ka bixiyay jidka iyo meesha uu marayo ayaa yidhi “Shaqadii jidku waa gabagabo, hadii Eebe idmo waxa inooga dhiman jidka dila iyo boorama isku xidha 1km oo ay noo qorshaysan tahay inaan bilawno todobaadka dambe, waxa aan wadnaa hawshaas aadka u balaadhan, waxana aan hadii aaan ASARDA nahay qaadanay inaan ku shaqayno halhayska ah hadal yar iyo hawl badan, waxana aan balan qaadaynaa inaan dhamayno jidkaas hadii Eebe Idmo.
Sh. Maxamed Shiine oo isaguna halkaasi ka hadlay, kana jeediyay hadalo dhiiri galin u badan ayaa waxa uu yidhi “Eebe ayaa mahadleh, noo suura galiyay in dadka gobolkan Awdal ay dhistaan jidkan isku xidha Dila iyo Boorama ee ay midada dheer ku taamayeen, waxa kale oo mahad leh xukuumada, hayada ASARDA iyo dhamaan dadkii ka qayb qaatay dhismaha jidkaasi”
Sh. Maxamed waxa uu la hadlay qurbojoogta gobolka Awdal waxana uu yidhi “sida la sheegay jidkan waa gabogabo, waxana dhiman jidkii waynaa ee isku xidhayay Boorama iyo Lawyacado, waa meeshaas meesha looga baahan yahay in loo hinqado, waa jidkaas jidka u baahan in la isugu tago oo la sii amba qaado lagana midho dhaliyo, waajidkaas jidka soo afjaraja tusaalaha wanaagsan ee waxqabadka ah ee dadka goboladan oo ay qayb ka yihiin qiurbojoogu laga bartay, waxa aan ku arkay wadadan maanta wax lagu farxo, waxa ay ahayd meel dhib badan dadka ku haysay, waxana ay maanta tahay meel cidwalba oo qurbojoog ah oo aragta ay ku farxayso, wadadu waxa ay ka mid tahay meelaha ay diintu amaantay mansabka sarena dhigtay ee la sheegay in laga wada qayb qaato, sidoo kale waxa aan u sheegayaa dhamaan dadka dalka gudahiisa inay ka qayb qaataan dhismaha jidkaasi isku xidhkiisa”
Xaaji Muumin Jaamac Samaale oo ka mid ah masuuliyiinta hayada ASARADA oo isaguna ka hadlay halkaasi ayaa sheegay in jidku uu gabogabo yahay loona baahan yahay in la soo celiyo iskaashigii lagu taabagaliyay dhiska jidkan, waxa aan sheegayaa in ay maanta beenoowday waxii la odhan jiray jid shicib ma dhisaan, maantana way dhisantay oo xukuumaduna way taageertay, sidaasi aawadeed dal iyo dibadaba waan taageeraynaa oo aan soo dhawaynaynaa dhismaha jidkaasi”
Wadadii ka soo bilaabatay Dila dhinacna ka timid Boorama, maanta way isku xidhmaysaa, waana guul, wadadaasi waa wado tayo leh oo aad u wanaagsan, waxana ay hayada ASARDA dadaal u gashay in la dhiso wadadan, waxana maanta guul ah in Awdal ay ku hamido isku xidhka jidadka oo ay ka tanaasulaan dhismihii jidadka caratuulka ah ee la dhisi jiray, xukuumadana waxa soo jiitay waa waxqabadka dadka, waxana aan sheegayaa in wadada ay goolado badan leedahay, waxana aan u samayn doonaa calamadihii oo dhan oo aan ku jirno dhisahoodii, waxa ay wadadu u weecweecanaysaana waajidka oo aan la doonahay meelaha adayga ah, sidoo kalena dadkeena oo qoodiqoodi kaliya qota waan u quudhi waynay inaan kala goyno, waxana aan u samaynay meelaha gooladaha ah qaabdhismeed fiican oo la isku halayn karo.
Ismaaciil cabdi Riiraash oo ka mid ah masuuliyiinta hayada ASARDA oo isaguna halkaasi ka hadalay ayaa waxa uu yidhi “Wadadan dhismaheeda meel hoose ayaa laga soo bilaabay, maantana waa gabogabo, waxa ka qayb qaatay dhamaan dadka reer Somaliland meelkasta oo uu joogo, waxana aan sheegayaa inay tani ku tusayso sida ay hayada ASARDA isku xilqaantay, shilinwalba oo loo soo dirayna u galisay wadada, waxa jidkan ka muuqata is aaminaad inuu ku dhismay, waxanse sheegayaa in hawl balaadhan oo dhinaca jidka ahi ay dhiman tahay, waanan ku dardaarmaynaa oo waxa aan sii sheegaynaa in jidkii galbeedka ee ilaa xadka Djibouti isku xidhayay aan u hinqan doono, loona baahan yahay in laga wada qayb qaato oo dal dibad iyo dhamaan umada Islaamka ah oo dhanba ay ka soo qayb qaataan.
Wariye: Mustafe caraale
Gobanimo news.com
Borama office