Wararka ka imaanaya Jubada Hoose ayaa sheegay in kooxo hubeysan ay gabadh
ku dileen Tuulo lagu magacaabo Baqdaad oo ka tirsan degmada Hoosingow ee
Gobolka Jubada Hoose, kadib markii ay diiday inay Xijaab xidhato.
Sida wararka ay sheegayaan haweeneydan oo magaceeda lagu soo gaabiyay
Farxiyo ayaa saaka aroortii lagu dilay gurigeeda hortiisa, markii labo
ruux ay u yimaadeen, iyadoo banaanka fadhisay ay u sheegeen inay xijaab
xidhato, markii ay ka dhega adeegtay ay karbaasheen, kadibna madaxa ka toogteen
Mid ka mid ah ehelada gabadha oo la hadlay laanta afka Soomaaliga ee
BBC-da ayaa sheegay in sababta loo dilay gabadha ay aheyd inay xidhato
xijaabka.
Saaka hal saac iyo badh ayaa gabadha Farxiyo oo gurigeeda hortiisa
fadhiday waxaa u yimid niman dhalinyaro ah, waxay ku dhaheen xijaab
xidho, waa yahay ayay dhahday, markii ay ku soo noqdeen ayay ul ku
bilaabeen usha ayay iska qabatay, kadib labo xabad ayay madaxa kaga
dhufteen ayuu yifhi ninka ehelada la ahaa gabadha la dilay oo magaciisa
sababo amni u qariyay.
Waxaa uu sheegay in mar dambe lagu soo wargeliyay in raggii sidan
sameeyay iyagoo indhaha ka xidhan gaadhi lagu Qaaday, sida dadka deegaanka ay u sheegeen.
Sidoo kale waxaa uu sheegay in dhacdooyinkan ay yihiin nooc cusub, hase
ahaatee handadaada iyo indha gaduudis lagu hayay shacabka uu ahaa mid
horay u jiray.
Al-Shabaab ayaa iska fogeysay inay wax lug ah ku laheyd dilkan, waxaana
ay sheegeen in deegaanka uu falka dilka ka dhacay aanay ciidankooda ka
talin.
Si kastaba ha ahaatee waa markii u horeeysay ee la sheego haweeney
diiday xidhashada Xijaabka oo la dilo, iyadoo Al-Shabaab horay deegaanada
ay ka taliso ugu soo rogtay in haweenka ay qaataan xijaabka oo ay is asturaan.