Hargeysa(GNA)Madaxweynaha Somaliland Md. Axmed Maxamed Siilaanyo, ayaa la sheegay inuu go’aansaday inaanu tartanka doorashada madaxtooyada ee 2015 ka qayb geli doonin, xataa haddii ay wakhtigeeda oo ah bisha June ee 2015 ku qabsoonto doorashadu.Warkani wuxuu ku soo beegmayaa billo yar kaddib shirweynihii xisbiga Kulmiye oo ku dhamaaday iyadoo aan la dooran Musharixiinta Madaxweynaha iyo ku-xigeenkiisa, balse hogaanka xisbigu sheegay inuu Musharaxnimada uga tanaasulayo Siilaanyo.
“Siilaanyo waxaa la sheegay inuu ka tanaasulay musharaxnimadii, warkaa markaan saaka arkay waxaan aad ula yaabay ayuu noqday, laakiinse yaa imanaya ayay isweydiintu tahay” sidaasi waxa Gobanimonews u sheegay mid ka mid ah falanqeeyayaasha siyaasadda ee Hargeysa ku sugan oo aan xeel dheeri ku cabirin mowduucan oo uu saaka daabacay wargeyska Afrika.
Ma jiro war rasmi ah oo uu Madaxweynuhu ku cadeeyay go’aankan, laakiin wargeyska Geeska Afrika ayaa ku waramay in warar uu ka helay ilo-wareedyo ay sheegayaan in Madaxweyne Siilaanyo uu toddobaadkan dhammaaday laba kulan oo kala duwan ku qabtay xarunta madaxtooyada, halkaas oo dadkii uu la kulmay uu ugu bandhigay mawqifkiisan cusub.
“Madaxweynaya ayaa sida ay wararkani sheegeen wuxuu toddobaadkan kulan madaxtooyada isugu yeedhay xubno wasiiro ah iyo guddoomiyaha xisbiga KULMIYE Md. Muuse Biixi Cabdi. Wuxuu ugu bandhigay go’aanka uu qaatay ee ah inaanu ka qayb gelin tartanka doorashada madaxtooyada, xataa haddii ay wakhtigeeda ku qabsoonto, waxaanu sheegay inuu go’aansaday inuu teeramkan uu hadda ku gudo jiro ku joojiyo xilka qaran ee uu hayo. Kulankan ayaa waxa ka qayb galay guddoomiyaha KUMIYE Md. Muuse Biixi Cabdi, wasiirada arrimaha dibadda, waxbarashada, madaxtooyada, duulista iyo hawada iyo ciyaaraha iyo xildhibaano ka mid ah kuwa ugu dhow dhow madaxtooyada.”ayaa lagu yidhi Ubucda warka wargeysku daabacay.
Dareen celin deg deg ah
Warkan oo ah mid wali qariib ku ah masraxa Siyaasadda ee maxaliga ah, waxa uu durba curiyay dood u dhaxaysa taageerayaasha Madaxweynaha iyo Kulmiyahanada aan taageersanayn ee inuu kursiga musharaxnimada baneeyo doonaya.
Waxa kale oo la saadaalinayaa inuu albaabka u furo Loolan kale oo ka dhex bilaabma xisbiga uu odayga u yahay ee Kulmiye.
Waxa jira rag badan oo ku goodinaya inay xisbiga metelaan doorashada Madaxtooyada ee soo socota, kuwaasoo fursad ka raadinayay madaxweynaha. Dhowr siyaasi oo uu ka mid yahay Wasiirka Maaliyada Cabdicasiis Maxamed Samaale, ayaa u hanqal taagayey tan iyo bilowgii sanadkii la soo dhaafay in maruun dhegahoodu ay maqlaan Madaxweyne Siilaanyo wuu ka tanaasulay Musharaxnimadii Kulmiye.
“Maalinta uu madaxweynahaygu caddeeyo inaanu musharax ahayn, ayaan caddeynayaa Musharaxnimadayda, waana han igu jira oo aan qarsanaynin” ayuu shir jaraa’id ku sheegay Wasiir samaale, xilligii loolanka Xisbigu aloosnaa horaantii sanadkan.
Ma cadda in Guddoomiyaha Xisbiga Kulmiye Muuse Biixi Cabdi dib u soo hungurayn doono Kursiga labaad ee Xisbiga oo uu mar hore uga tanaasulay silaanyo, kaddib markii ay cirka dab kaa raac ku noqotay doonis hore oo uu ku sheegay inuu kula tartamayo cid kasta oo Musharaxnimo doonaysa.
Xisbi kala Daadsan
Xisbiga wali kala daadsan ee Kulmiye wuxuu waajahayaa marxalad kale oo loolan ah, taasoo u muuqata inay tii hore ee sababtay khilaafka ka sii culustahay, waxaana lagu tartami doonaa jagada Kursiga lagu gaadhayo ee Musharaxa madaxweynaha oo ka madaxbanaan Guddoomiyaha, hadaan sharciga xisbiga sidii hore lagu soo celin.
Hadii uu siilaanyo tanaasulo waxa duhur cad isku muruxsan doona siyaasiyiintii mansab ku dirirka ahayd ee qaarkood madaxtooyada dabada kula jireen, kuwaasoo iska heli doona saaxad aanay isku ixtiraami doonin laysku badheedhayo.
Waxaase jira rag wax badan og, u haysta inaan dhaxaltooyada xisbiga meelna looga riixi Karin, cid ka qaadaysaana jirin oo haatan madaxweynaha hogaamintiisa door weyn ku leh, sugayana inay ku durkaan Kursiga talaabada u jira ee uu hada Madaxweyne Siilaanyo ku fadhiyo.
Way iska cadahay inay ka taageero badan yihiin kuwa xisbiga hada taladiisa, saameynta siyaasada ee Bulshadana kaga awood badanyihiin ragaasi, mase cadda siday iyaga laftoodu ugu heshiin doona qofka ay caleenta Musharaxnimada saarayaan, hadii uu siilaanyo ka dhabeeyo warka laga soo sheegay.
Mucaaridka iyo Musharaxnimada Siilaanyo
Xisbiyada Mucaaridka ah ee Somaliland waxay musharaxniamda madaxweyne Siilaanyo ku ahayd laba daran mid dooro. Mar waxay ka war war qabeen inuu ku noqdo ruugcadaadi siyaasaddeed oo aanay loodin Karin hadii uu mar kale musharaxnimo waysada u biyeysto.
Mar kale waxay qaarkood is-tusayeen inaanu sumcad badan ku lahayn Shacbiga dhexdiisa, isla markaana hadii isu soo taago madaxweyne mar labaad ay si fudud u tukhan tukhin karaan.
Mid ay ahaataba Madaxweynaha haysta fursada kooban ee hogaamineed muddadii xilka loo doortay, waxa uu u muuqdaa inuu ka daalay tartanka siyaasadda, doonayana inuu noqdo oday ka dega kursiga isagoo heli karaya inuu mar kale shacbiga Kalsooni waydiisto, taasoo uu ka door bidayo inuu sumcad iyo qadarin kaga kasbado bulshada reer Somaliland.
Saleeban Cabdi Cali
Gobanimonews
Hargeysa Office
Email: curad1986@hotmail.com