Kaka ayaa ka degay wadanka Koonfur Afrika wax yar uun kadib markii uu qalinka ku duugay heshiis ku kacay €70 million oo uu ugu wareegay kooxda Real Madrid, hormuudna ka noqday ciyaartii weerarka quruxda badan ku dhisnayd ee ay Brazil la tagtay ciyaarihii koobka aduunka , iyadoo uu garabkiisana taagnaa xidigii Number ka 10 u sitay xulka lagu naanayso Selecao ee Ronaldinho kahor intii aanay Holland ku soo reebin ciyaartii Rubuc Finalka.
Todobaadkan ayuu ciyaaryahankan xidignimada Aduunka mar haysan jiray ee 32 jirka ahi dib ugu noqday xulka Brazil mudo 18 bilood ah kadib markii koobaad, kadib markii Tababare Dunga oo ahaa macalinkii watay xulkii Brazil ee tartanka koobka aduunka kaga qayb gallay South Afrika 2010-kii uu ku soo daray liiska xulkiisa si uu ugu buuxiyo booska uu ka dhaawacmay ciyaaryahan Ricardo Goulart.
“Aad baan uga wanaagsanahay, jidh ahaan, farsamo ahaan iyo Xirfad ahaanba.” ayuu Kaka ku yidhi isagoo ka hadlayay shirkii Jaraaid ee xulka Brazil ku qabtay huteelka the Intercontinental Hotel ee caasimada Beijing.
“Maanta ayaan akhriyi karaa wax kastoo ka socda garoonka gudihiisa, qaangaadhna iyo khibrad badana u leeyahay inaan ku sameeyo waxaanan hore ugu samayn kari jirin.
“Yeedhmadan xulka la igu soo daray waxay timid wakhti aan si fiican ugu ciyaaro kooxda Sao Paulo.”
Kaka ayaa rajaynaya in ciyaarta Sabtida ee Gillette Superclasico de las Americas oo ay ka hor tagayaan xulka Argentina uu soo bandhigo awoodiisa markii ugu horeysay xulka Brazil tan iyo bishii March 2013, aadna uu u doonayo inuu ka abaal celiyo soo dhawayntii aadka u saraysay ee ay taageerayaashu ku qaabileen markii uu soo cago dhigtay gegida diyaaradaha caasimada wadanka Shiinaha ee Beijing oo Brazil iyo Argentina fooda isku dari doonaan.